ಆಧಾರ್- ಪ್ಯಾನ್ ನಂ. ಜೋಡಣೆ ಮಾಡದವರಿಗೆ ಮತ್ತೊಂದು ಅವಕಾಶ

ನಂಬರ್​ ಜೋಡಣೆ ಮಾಡದೇ ಹೋದರೆ ಏನಾಗುತ್ತದೆ ಎಂಬುದರ ಕುರಿತು ಐಟಿ ಇಲಾಖೆ ಇದುವರೆಗೂ ಸ್ಪಷ್ಟನೆ ಸಹ ನೀಡಿಲ್ಲ. ಆದಾಯ ತೆರಿಗೆ ರಿಟರ್ನ್ಸ್​ ಫೈಲ್‌, ವಾಣಿಜ್ಯಾತ್ಮಕ ಬಳಕೆ, ಬ್ಯಾಂಕಿಂಗ್​ ವಹಿವಾಟು ಸೇರಿದಂತೆ ಕೆಲವು ವ್ಯವಹಾರಗಳಲ್ಲಿ ತೊಡಕಾಗುವ ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ.

ನವದೆಹಲಿ: 12 ಸಂಖ್ಯೆಗಳ ಆಧಾರ್ ಅನ್ನು ಬ್ಯಾಂಕ್‌ ಖಾತೆಯ ಶಾಶ್ವತ ಖಾತೆ ಸಂಖ್ಯೆ (ಪ್ಯಾನ್‌ ಕಾರ್ಡ್‌) ಜೋಡಣೆಗೆ ಮಾರ್ಚ್​ 31 ಕೊನೆಯ ದಿನವೆಂದು ಡೆಡ್​​ಲೈನ್​ ನೀಡಲಾಗಿತ್ತು. ಆದ್ರೆ ಪ್ಯಾನ್​ ಕಾರ್ಡ್​ಗೆ ಆಧಾರ್​ ಜೋಡಣೆ ಮಾಡದವರಿಗೆ ಮತ್ತೊಂದು ಸಮಯಾವಕಾಶ ಸಿಕ್ಕಿದೆ.

ಇದಕ್ಕೂ ಮೊದಲು ಆಧಾರ್​- ಪ್ಯಾನ್ ಜೋಡಣೆ 2018ರ ಜೂನ್ 30ಕ್ಕೆ ಕೊನೆಯ ದಿನವೆಂದು ಹೇಳಲಾಗಿತ್ತು. ಜನರು ನಿರೀಕ್ಷಿತ ಪ್ರಮಾಣದಲ್ಲಿ ಸ್ಪಂದಿಸದೇ ಇದ್ದಾಗ ದಿನಾಂಕವನ್ನು 2019ರ ಮಾರ್ಚ್​ 31ಕ್ಕೆ ಮುಂದೂಡಲಾಗಿತ್ತು. ಈಗ ಮತ್ತೆ ದಿನಾಂಕವನ್ನು ತೆರಿಗೆ ಇಲಾಖೆ ವಿಸ್ತರಿಸಿದೆ.

'ಆಧಾರ್ ಸಂಖ್ಯೆಯನ್ನು ಪಾನ್ ಜೊತೆಗೆ ಸಂಪರ್ಕಿಸಲು ಕೊನೆಯ ದಿನಾಂಕವನ್ನು 2019ರ ಸೆಪ್ಟೆಂಬರ್ 30ರ ವರೆಗೂ ವಿಸ್ತರಿಸಲಾಗಿದೆ. ಎಪ್ರಿಲ್ 1 ರಿಂದ ಜಾರಿಗೆ ಬರುವಂತೆ ಆಧಾರ್ ಸಂಖ್ಯೆಯನ್ನು ಉಲ್ಲೇಖಿಸಿ ಆದಾಯದ ಮರುಪಾವತಿ ಸಲ್ಲಿಸುವುದು ಕಡ್ಡಾಯವೆಂದು ಕೇಂದ್ರೀಯ ತೆರಿಗೆ ಇಲಾಖೆ ನಿರ್ದೇಶಕ ಮಂಡಳಿ ಸೂಚಿಸಿದೆ.