ಘಾಜಿಯಾಬಾದ್: 34 ವರ್ಷದ ಸಾಫ್ಟ್ವೇರ್ ಎಂಜಿನಿಯರ್ನೋರ್ವ ಪತ್ನಿ ಸೇರಿದಂತೆ ಮೂವರು ಮಕ್ಕಳ ಕೊಲೆ ಮಾಡಿದ್ದಾನೆ. ಆ ಬಳಿಕ ಕೊಲೆ ಮಾಡಿದ ದೃಶ್ಯವನ್ನ ಕುಟುಂಬದ ವಾಟ್ಸ್ಆ್ಯಪ್ ಗ್ರೂಪ್ನಲ್ಲಿ ಹಾಕಿದ್ದಾರೆ. ಜತೆಗೆ ತಾನು ಕೊಲೆ ಮಾಡಿರೋದನ್ನ ಒಪ್ಪಿಕೊಂಡಿದ್ದಾನೆ.
ಉತ್ತರಪ್ರದೇಶದ ಘಾಜಿಯಾಬಾದ್ನ ಇಂದಿರಾಪುರಂನಲ್ಲಿ ಈ ಘಟನೆ ನಡೆದಿದೆ. ಪೊಲೀಸರು ತಿಳಿಸಿರುವಂತೆ ಸುಮಿತ್ ಕುಮಾರ್ ಪತ್ನಿ ಅನ್ಸುಬಾಲ್(32),ಐದು ವರ್ಷದ ಮಗು ಪ್ರಥಮೇಶ್, ಹಾಗೂ ನಾಲ್ಕು ವರ್ಷದ ಅರಾವ್ ಮತ್ತು ಆಕೃತಿ ಸಾವನ್ನಪ್ಪಿದ್ದಾರೆ. ಘಟನೆ ನಂತರ ಸ್ಥಳದಿಂದ ಪಲಾಯನಗೈಯುವುದಕ್ಕೂ ಮುನ್ನ ತಾನು ಸೈನೇಡ್ ಖರೀದಿ ಮಾಡಿ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿಯೂ ವಿಡಿಯೋ ಮಾಡಿ ಕುಟಂಬದ ವಾಟ್ಸ್ಆ್ಯಪ್ನಲ್ಲಿ ಶೇರ್ ಮಾಡಿದ್ದಾನೆ. ವಿಡಿಯೋದಲ್ಲಿ ತಾನು ವಿಷ ಖರೀದಿ ಮಾಡಿರುವ ಮೆಡಿಕಲ್ ಸ್ಟೋರ್ ಮಾಲೀಕನ ಹೆಸರು ಸಹ ಹೇಳಿದ್ದು, ಆತ ತನಗೆ 1ಲಕ್ಷ ರೂ. ವಂಚನೆ ಮಾಡಿದ್ದಾನೆಂದು ತಿಳಿಸಿದ್ದಾನೆ.
ಈ ವಿಡಿಯೋವನ್ನ ಇಂದಿರಾಪುರಂನಲ್ಲಿ ವಾಸವಾಗಿದ್ದ ಸುಮಿತ್ ಕುಮಾರ್ ಸಹೋದರಿ ನೋಡಿ, ಸೋದರಳಿಯ ಪಂಕಜ್ ಸಿಂಗ್ಗೆ ತಿಳಿಸಿದ್ದಾಳೆ. ಆತ ಮನೆಗೆ ತೆರಳಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ತಕ್ಷಣ ಸ್ಥಳಕ್ಕಾಗಮಿಸಿದ ಪೊಲೀಸರು ಪರಿಶೀಲನೆ ನಡೆಸಿದಾಗ ಪತ್ನಿ ಹಾಗೂ ಮೂವರು ಮಕ್ಕಳು ಸಾವನ್ನಪ್ಪಿರುವ ಮಾಹಿತಿ ತಿಳಿದು ಬಂದಿದೆ.
ವೃತ್ತಿಯಲ್ಲಿ ಸಾಫ್ಟ್ವೇರ್ ಎಂಜಿನಿಯರ್ ಆಗಿದ್ದ ಸುಮಿತ್ ಕುಮಾರ್ ಕಳೆದ ಡಿಸೆಂಬರ್ ತಿಂಗಳಲ್ಲಿ ಕೆಲಸ ಬಿಟ್ಟಿದ್ದನಂತೆ. ಆತನ ಪತ್ನಿ ಶಿಕ್ಷಕಿಯಾಗಿ ಸೇವೆ ಸಲ್ಲಿಸುತ್ತಿದ್ದಳು. ಸುಮಿತ್ ಕೆಲಸ ಬಿಟ್ಟ ನಂತರ ಮನೆ ಹಾಗೂ ಮಕ್ಕಳ ಶಿಕ್ಷಣದ ಖರ್ಚು ನೋಡಿಕೊಳ್ಳಲು ಹಣಕಾಸಿನ ತೊಂದರೆ ಉಂಟಾಗಿತ್ತು ಎಂದು ತಿಳಿದು ಬಂದಿದೆ. ಈತನೊಂದಿಗೆ ಪೋಷಕರು ಸಹ ವಾಸವಾಗಿದ್ದರು ಎಂಬ ಮಾಹಿತಿಯನ್ನ ಸ್ಥಳೀಯರು ನೀಡಿದ್ದಾರೆ.
2011ರಲ್ಲಿ ವಿವಾಹವಾಗಿದ್ದ ಈತ ಗುರುಗ್ರಾಮ್, ನೋಯ್ಡಾ ಹಾಗೂ ಬೆಂಗಳೂರು ಸೇರಿದಂತೆ ಅನೇಕ ಕಡೆ ಸಾಫ್ಟ್ವೇರ್ ಎಂಜಿನಿಯರ್ ಆಗಿ ಕೆಲಸ ಮಾಡಿದ್ದನು. ನಂತರ ಘಾಜಿಯಾಬಾದ್ನಲ್ಲಿ ಕೆಲಸ ಮಾಡುತ್ತಿದ್ದ ಈತ, ಕಳೆದ ಡಿಸೆಂಬರ್ನಲ್ಲಿ ಕೆಲಸಕ್ಕೆ ರಾಜೀನಾಮೆ ನೀಡಿದ್ದನು. ಘಟನೆ ನಡೆದ ಬಳಿಕ ಸುಮಿತ್ ಮೊಬೈಲ್ ಸ್ವೀಚ್ ಆಫ್ ಆಗಿದೆ.
