ಜಿಲ್ಲೆಯ ಅರಕು ಲೋಕಸಭಾ ಕ್ಷೇತ್ರದ ಚುನಾವಣೆಯಲ್ಲಿ ತಂದೆ - ಮಗಳು ಅಖಾಡಕ್ಕೆ ಧುಮುಕ್ಕಿದ್ದಾರೆ. ಮುದ್ದಾಗಿ ಸಾಕಿರುವ ತಂದೆ ವಿರುದ್ಧವೇ ಮಗಳು ಪೈಪೋಟಿ ನಡೆಸಲು ಸಜ್ಜಾಗಿದ್ದಾರೆ. ಕೇಂದ್ರ ಮಾಜಿ ಮಂತ್ರಿ ಕಿಶೋರ್ ಚಂದ್ರದೇವ ಮೂಲತಃ ಕಾಂಗ್ರೆಸ್ ಪಕ್ಷದವರು. ರಾಜಕೀಯದಲ್ಲಿ ತಮ್ಮದೇ ಆದ ಚಾಪು ಮೂಡಿಸಿದ್ದಾರೆ ಕೂಡಾ. ಅತೀ ಹೆಚ್ಚು ಅಭಿಮಾನಿ ಬಳಗವನ್ನು ಹೊಂದಿರುವ ಅವರು ಇತ್ತೀಚೆಗೆ ಕಾಂಗ್ರೆಸ್ ಪಕ್ಷ ತೊರೆದು ತೆಲುಗು ದೇಶಂ ಪಾರ್ಟಿಗೆ ಲಗ್ಗೆಯಿಟ್ಟರು. ಇವರಿಗೆ ಟಿಡಿಪಿ ಪಕ್ಷ ಅರಕು ಲೋಕಸಭಾ ಕ್ಷೇತ್ರದ ಎಂಪಿ ಟಿಕೆಟ್ ನೀಡಿ ಆಹ್ವಾನಿಸಿದೆ.
ಲೋಕ ಸಮರಕ್ಕೆ ತಂದೆ - ಮಗಳು ಸಜ್ಜು... ಮುದ್ದಾಗಿ ಸಾಕಿದ ಅಪ್ಪನಿಗೆ ಪುತ್ರಿಯ ಸವಾಲ್! - ಪುತ್ರಿಯ ಸವಾಲ್
ವಿಶಾಖಪಟ್ಟಣಂ: ಲೋಕಸಭಾ ಚುನಾವಣೆ ಕಾವು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಕಾಂಗ್ರೆಸ್ ತೊರೆದು ಇತ್ತೀಚೆಗೆ ಟಿಡಿಪಿ ಸೇರಿದ್ದರು. ಕಿಶೋರ್ ಚಂದ್ರ ಅವರ ನಿರ್ಧಾರಕ್ಕೆ ಭರ್ಜರಿ ಟಾಂಗ್ ಕೊಟ್ಟಿರುವ ಕಾಂಗ್ರೆಸ್ ಅಪ್ಪನ ವಿರುದ್ಧ ಮಗಳನ್ನೇ ಕಣಕ್ಕಿಳಿಸಿದೆ. ಇದು ಆಂಧ್ರಪ್ರದೇಶ ರಾಜಕೀಯದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ.
ಕೃಪೆ: eenadu.net
ಇನ್ನು ಕಿಶೋರ್ ಚಂದ್ರ ಅವರ ರಾಜಕೀಯ ವಾರಸುದಾರಳೆಂದೇ ಭಾವಿಸುತ್ತಿದ್ದ ಆತನ ಮಗಳು ಶ್ರುತಿದೇವಿ ಮಾತ್ರ ಕಾಂಗ್ರೆಸ್ ಪಕ್ಷ ತೊರೆಯದೇ ಅಲ್ಲೇ ಉಳಿದುಕೊಂಡಿದ್ದಾರೆ. ಪ್ರಬಲ ನಾಯಕನನ್ನು ಕಳೆದುಕೊಂಡ ಕಾಂಗ್ರೆಸ್ ಪಕ್ಷ ಅರಕು ಲೋಕಸಭಾ ಕ್ಷೇತ್ರದಲ್ಲಿ ಪೈಪೋಟಿಗೆ ಯಾರನ್ನು ನಿಲ್ಲಿಸಬೇಕೆಂಬ ಚಿಂತೆಗೀಡಾಗಿತ್ತು. ಬಳಿಕ ಆಲೋಚಿಸಿದ ಪಕ್ಷದ ಮುಖ್ಯಸ್ಥರು ಕಿಶೋರ್ ಚಂದ್ರದೇವ ಮಗಳು ಶ್ರುತಿದೇವಿಗೆ ಟಿಕೆಟ್ ನೀಡಿದ್ದಾರೆ. ಹೀಗಾಗಿ ತಂದೆ-ಮಗಳ ಮಧ್ಯ ಪೈಪೋಟಿ ನಡೆಯುತ್ತಿದೆ.
ಪರಿಸರ ಕಾನೂನು ವ್ಯಾಸಂಗ ಮುಗಿಸಿರುವ ಶ್ರುತಿದೇವಿ ಕಳೆದ ಮೂರು ಚುನಾವಣೆಯಲ್ಲಿ ತಮ್ಮ ತಂದೆ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿಯಾಗಿದ್ದಾಗ ಪ್ರಚಾರ ಕೈಗೊಂಡಿದ್ದರು. ಈಗ ಸ್ವತಃ ಅವರೇ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿಯಾಗಿ ತಂದೆ ವಿರುದ್ಧ ಸವಾಲ್ ಹಾಕಿದ್ದಾರೆ. ಆದ್ರೆ ಅಭಿಮಾನಿಗಳು ಮಾತ್ರ ಯಾರ ಕೈ ಹಿಡಿಯಲಿದ್ದಾರೆ ಎಂಬುದು ಚುನಾವಣೆಯ ಬಳಿಕ ಗೊತ್ತಾಗಲಿದೆ.