IPL​​ನಲ್ಲಿ ಮೊದಲ ಸಲ 'ಪ್ಲೇ ಆಫ್​​'​ ಗೆದ್ದ ಡೆಲ್ಲಿ...​​ ಪಂತ್​ ಆಟಕ್ಕೆ ಸೆಹ್ವಾಗ್​ ಫಿದಾ!

ಪ್ರಸಕ್ತ ಸಾಲಿನ ಐಪಿಎಲ್​​ನಲ್ಲಿ ಪ್ಲೇ-ಆಫ್ ಹಂತದ ಎಲಿಮಿನೇಟರ್ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ತಂಡಕ್ಕೆ ಶಾಕ್​ ನೀಡಿದ ಡೆಲ್ಲಿ ಕ್ಯಾಪಿಟಲ್ಸ್ ಎರಡನೇ ಕ್ವಾಲಿಫೈಯರ್ ಹಂತಕ್ಕೆ ಲಗ್ಗೆ ಹಾಕಿದೆ.

ವಿಶಾಖಪಟ್ಟಣಂ:ಐಪಿಎಲ್​​ನ ಎಲಿಮಿನೇಟರ್​ ರೋಚಕ ಪಂದ್ಯದಲ್ಲಿ ಸನ್​ರೈಸರ್ಸ್​ ವಿರುದ್ಧ ಡೆಲ್ಲಿ ತಂಡ ಎರಡು ವಿಕೆಟ್​ಗಳ ಗೆಲುವು ದಾಖಲು ಮಾಡಿ ಮುಂದಿನ ಹಂತಕ್ಕೆ ಲಗ್ಗೆಯಿಟ್ಟಿದೆ.

ವಿಶಾಖಪಟ್ಟಣಂನ ವಿಡಿಸಿಎ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಸನ್​ರೈಸರ್ಸ್​ ನೀಡಿದ್ದ 163ರನ್​ಗಳ ಟಾರ್ಗೆಟ್​ ಬೆನ್ನತ್ತಿದ್ದ ಡೆಲ್ಲಿ ಅನೇಕ ಸಲ ನಾಟಕೀಯ ತಿರುವು ಪಡೆದುಕೊಂಡು 19.5ಓವರ್​ಗಳಲ್ಲಿ8ವಿಕೆಟ್​ ಕಳೆದುಕೊಂಡು 165ರನ್​ಗಳಿಕೆ ಮಾಡಿ ಗೆಲುವಿನ ದಡ ಸೇರಿತು. ಈ ಗೆಲುವಿನೊಂದಿಗೆ ತಂಡ ಇದೇ ಮೊದಲ ಬಾರಿಗೆ ಐಪಿಎಲ್​ ನಾಕೌಟ್​ ಹಂತದಲ್ಲಿ ಗೆಲುವು ದಾಖಲಿಸಿದೆ. ಈ ತಂಡ ಈ ಹಿಂದೆ ನಾಲ್ಕು ಬಾರಿ ‘ಪ್ಲೇ ಆಫ್‌’ ಹಂತದಲ್ಲಿ ಎಡವಿತ್ತು. 2008,2009 ಹಾಗೂ 2012ರಲ್ಲಿ ಸೋಲು ಕಂಡಿತು.

ಡೆಲ್ಲಿ ತಂಡದ ಪರ ಅದ್ಭುತ ಬ್ಯಾಟಿಂಗ್​ ಪ್ರದರ್ಶನ ನೀಡಿದ ಆರಂಭಿಕ ಪೃಥ್ವಿ ಶಾ ಹಾಗೂ ತಂಡ ಸಂಕಷ್ಟಕ್ಕೆ ಸಿಲುಕಿದ ವೇಳೆ ಅಬ್ಬರಿಸಿದ ರಿಷಭ್​ ಪಂತ್​ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದರು.

ಡೆಲ್ಲಿ ತಂಡದ ಪ್ರದರ್ಶನಕ್ಕೆ ಟೀಂ ಇಂಡಿಯಾ ಮಾಜಿ ಪ್ಲೇಯರ್​ ವಿರೇಂದ್ರ ಸೆಹ್ವಾಗ್​ ಫುಲ್​ ಖುಷ್​ ಆಗಿದ್ದು, ಟ್ವೀಟ್​ ಮಾಡಿ ಅಭಿನಂದನೆ ಸಲ್ಲಿಸಿದ್ದಾರೆ. ಪ್ರಮುಖವಾಗಿ ಉದಯೋನ್ಮುಖ ಆಟಗಾರ ರಿಷಭ್​ ಪಂತ್​ ಬ್ಯಾಟಿಂಗ್​ಗೆ ವೀರೂ ಫಿದಾ ಆಗಿದ್ದಾರೆ.