ಮಧ್ಯಪ್ರದೇಶದಲ್ಲೂ ಅಲುಗಾಡ್ತಿದೆ 'ಕೈ'​ ಸರ್ಕಾರ, ಬಹುಮತಕ್ಕೆ ಬಿಜೆಪಿ ಆಗ್ರಹ, ರಾಜ್ಯಪಾಲರಿಗೆ ಪತ್ರ!

ಅಲ್ಪ ಬಹುಮತದೊಂದಿಗೆ ಮಧ್ಯಪ್ರದೇಶದಲ್ಲಿ ಸರ್ಕಾರ ರಚನೆ ಮಾಡಿರುವ ಮಧ್ಯಪ್ರದೇಶ ಕಾಂಗ್ರೆಸ್​ ಸರ್ಕಾರಕ್ಕೆ ಇದೀಗ ವಿಶ್ವಾಸಮತಯಾಚನೆ ಮಾಡುವಂತೆ ಬಿಜೆಪಿ ಆಗ್ರಹಿಸಿದೆ.

ಭೋಪಾಲ್​:ಚುನಾವಣೋತ್ತರ ಸಮೀಕ್ಷಾ ಫಲಿತಾಂಶ ಹೊರಬರುತ್ತಿದ್ದಂತೆ ಮಧ್ಯಪ್ರದೇಶ ರಾಜ್ಯ ರಾಜಕೀಯದಲ್ಲಿ ಮಹತ್ವದ ಬದಲಾವಣೆ ಕಂಡು ಬಂದಿದ್ದು, ಕಾಂಗ್ರೆಸ್​ ನೇತೃತ್ವದ ಕಮಲ್​ನಾಥ್​ ಸರ್ಕಾರಕ್ಕೆ ಬಹುಮತವಿಲ್ಲ ಎಂಬ ಮಾತು ಕೇಳಿ ಬರುತ್ತಿದೆ.

ಇದೇ ವಿಷಯವನ್ನಿಟ್ಟುಕೊಂಡು ಬಿಜಿಪಿ ರಾಜ್ಯಪಾಲೆ ಆನಂದಿ ಬೆನ್ ಪಟೇಲ್​ಗೆ ಪತ್ರ ಬರೆದಿದ್ದು, ವಿಶೇಷ ಅಧಿವೇಶನ ಕರೆಯುವಂತೆ ಮನವಿ ಮಾಡಿಕೊಂಡಿದ್ದಾರೆ. ಬಿಜೆಪಿ ಪ್ರತಿಪಕ್ಷ ನಾಯಕ ಗೋಪಾಲ್ ಭಾರ್ಗವ್​ ಈ ಮಾಹಿತಿ ಹೊರಹಾಕಿದ್ದು, ಅಧಿವೇಶನದಲ್ಲಿ ರೈತರ ಸಾಲಮನ್ನಾ ಸೇರಿದಂತೆ ಮಹತ್ವದ ವಿಷಯಗಳ ಬಗ್ಗೆ ಚರ್ಚೆ ನಡೆಸಬೇಕಾಗಿದ್ದು, ಈ ವೇಳೆ ಬಹುಮತ ಕೂಡ ಸಾಬೀತುಪಡಿಸಬೇಕಾಗಿದೆ ಎಂದು ಭಾರ್ಗವ್​ ತಿಳಿಸಿದ್ದಾರೆ.

ಕಾಂಗ್ರೆಸ್​ ಸರ್ಕಾರಕ್ಕೆ ಎಸ್ಪಿ ಹಾಗೂ ಬಿಎಸ್ಪಿಯ ಓರ್ವ ಶಾಸಕ, ನಾಲ್ವರು ಪಕ್ಷೇತರ ಶಾಸಕರು ಬೆಂಬಲ ಸೂಚಿಸಿದ್ದು, ಇದೀಗ ಅವರ ನಡುವೆ ಒಳಜಗಳ ಶುರುವಾಗಿವೆ. ಹೀಗಾಗಿ ವಿಶೇಷ ಅಧಿವೇಶನದಲ್ಲಿ ಬಹುಮತ ಸಾಬೀತು ಮಾಡಬೇಕು ಎಂದು ಬಿಜೆಪಿ ಆಗ್ರಹಿಸಿದೆ.

230 ಸದಸ್ಯರ ಮಧ್ಯಪ್ರದೇಶ ವಿಧಾನಸಭೆಗೆ ಕಳೆದ ವರ್ಷ ಚುನಾವಣೆ ನಡೆದಿತ್ತು. ಕಾಂಗ್ರೆಸ್ 114 ಸ್ಥಾನ ಗೆದ್ದರೆ, ಬಿಜೆಪಿ 109 ಸ್ಥಾನ ಗೆದ್ದಿತ್ತು. ಬಿಎಸ್ಪಿ 2 ಸ್ಥಾನ ಹಾಗೂ ಸಮಾಜವಾದಿ ಪಕ್ಷ-1 ಮತ್ತು ಪಕ್ಷೇತರರು 4 ಸ್ಥಾನ ಗೆದ್ದಿದ್ದಾರೆ.

ಬಿಎಸ್​​​ಪಿ ಹಾಗೂ ಪಕ್ಷೇತರರ ಬೆಂಬಲದೊಂದಿಗೆ ಕಮಲ್​​ನಾಥ್​ ಸರ್ಕಾರ ಅಧಿಕಾರ ನಡೆಸುತ್ತಿದೆ. ಇದೀಗ ಬಿಜೆಪಿಯ ಈ ಒತ್ತಾಯ ಕಮಲ್​ ಸರ್ಕಾರಕ್ಕೆ ಕಂಟಕ ತರುವ ಸಾಧ್ಯತೆ ಇದೆ.

ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಮಧ್ಯಪ್ರದೇಶ ಮುಖ್ಯಮಂತ್ರಿ ಕಮಲ್​ನಾಥ್ ಮಾತನಾಡಿದ್ದು, ಸರ್ಕಾರಕ್ಕೆ ಯಾವುದೇ ತೊಂದರೆ ಇಲ್ಲ. ಕಳೆದ ಐದು ತಿಂಗಳಲ್ಲಿ ನಾಲ್ಕು ಸಲ ಬಹುಮತ ಸಾಭೀತು ಪಡಿಸಿರುವೆ. ಬಿಜೆಪಿ ಮತೊಮ್ಮೆ ಬಲ ಪರೀಕ್ಷೆ ನಡೆಸಲು ಹೇಳುತ್ತಿದ್ದರೆ ನಾನು ಅದು ಕೂಡ ನಡೆಸುವೆ ಎಂದಿದ್ದಾರೆ.