Pegasus ಕುರಿತು ಚರ್ಚಿಸಲು ಮೋದಿ- ಶಾಗೆ ಏಕೆ ಭಯ: ದಿಗ್ವಿಜಯ್ ಸಿಂಗ್ ಪ್ರಶ್ನೆ

ಸಂಸತ್​ನಲ್ಲಿ ಪೆಗಾಸಸ್​ ಕುರಿತು ಮಾತನಾಡಲು ಮೋದಿ- ಅಮಿತ್​ ಶಾ ಯಾಕೆ ಹೆದರುತ್ತಿದ್ದಾರೆ ಎಂದು ಕಾಂಗ್ರೆಸ್ ಹಿರಿಯ ಮುಖಂಡ ದಿಗ್ವಿಜಯ್ ಸಿಂಗ್ ಪ್ರಶ್ನಿಸಿದ್ದಾರೆ.

ನವದೆಹಲಿ: ಕೇಂದ್ರ ಸರ್ಕಾರ ಪೆಗಾಸಸ್​ ವಿಚಾರವನ್ನು ಸಂಸತ್​ನಲ್ಲಿ ಚರ್ಚಿಸಲು ಯಾಕೆ ಹೆದರುತ್ತಿದೆ ಎಂದು ಕಾಂಗ್ರೆಸ್ ಹಿರಿಯ ಮುಖಂಡ ದಿಗ್ವಿಜಯ್ ಸಿಂಗ್ ಪ್ರಶ್ನಿಸಿದ್ದಾರೆ.

ಈ ಬಗ್ಗೆ ಟ್ವೀಟ್ ಮಾಡಿರುವ ಅವರು, ಪೆಗಾಸಸ್​​ ಬಗ್ಗೆ ಅಧಿವೇಶನದಲ್ಲಿ ಚರ್ಚಿಸಲು ಮೋದಿ- ಶಾ ಯಾಕೆ ಹೆದರುತ್ತಾರೆ. ಪೆಗಾಸಸ್​ ಅನ್ನು ಆಂತರಿಕ ಭದ್ರತೆ, ಮಾದಕ ವಸ್ತು ಸಂಬಂಧಿತ ಅಪರಾಧಗಳಿಗೆ ಬಳಸಿದ್ದರೆ ಸ್ವಾಗತಾರ್ಹ. ಆದರೆ, ಇವರು ಯಾಕೆ ಭಯ ಪಡುತ್ತಿದ್ದಾರೆ ಅನ್ನೋದು ಅರ್ಥವಾಗುತ್ತಿಲ್ಲ ಎಂದು ಉಲ್ಲೇಖಿಸಿದ್ದಾರೆ.

2019 ರಲ್ಲೇ ನಾನು ಪೆಗಾಸಸ್ ವಿಚಾರ ಪ್ರಸ್ತಾಪಸಿದ್ದೆ, ಆಗಿನ ಐಟಿ ಸಚಿವರು ನನ್ನ ಯಾವುದೇ ಪ್ರಶ್ನೆಗಳಿಗೆ ಉತ್ತರಿಸಲಿಲ್ಲ. ಇಂದು ಮತ್ತೆ ಈ ವಿಷಯ ಚರ್ಚೆಗೆ ಬಂದಿದ್ದು, ರಾಜ್ಯಸಭೆಗೆ ನೋಟಿಸ್ ನೀಡಿದ್ದೇನೆ. ಮೋದಿ ಮತ್ತು ಅಮಿತ್​ ಶಾ ಚರ್ಚೆಗೆ ಒಪ್ಪುತ್ತಾರೆ ಎಂದು ಭಾವಿಸಿದ್ದೇನೆ. ಇದೊಂದು ತುರ್ತು ರಾಷ್ಟ್ರೀಯ ಭದ್ರತೆಯ ವಿಷಯ ಎಂದಿದ್ದಾರೆ.

ಅಮಿತ್​ ಶಾ- ಮೋದಿ ಜೋಡಿ ಈ ಬಗ್ಗೆ ಯಾಕೆ ಚಕಾರ ಎತ್ತುತ್ತಿಲ್ಲ. ಅವರಿಗೆ ರಾಷ್ಟ್ರೀಯ ಭದ್ರತೆಯ ಬಗ್ಗೆ ಕಾಳಜಿಯಿಲ್ಲವೇ?. ಮಾರ್ಕ್​​ ಜುಕರ್​ಬರ್ಗ್​ ಅವರೇ ಎನ್​ಎಸ್​ಒ ವಿಚಾರದಲ್ಲಿ ದಯವಿಟ್ಟು ನಿಮ್ಮ ಆತ್ಮೀಯ ಗೆಳೆಯ ನರೇಂದ್ರ ಮೋದಿ ಅವರನ್ನು ನಿಮ್ಮ ವಿಷಯದಲ್ಲಿ ಸಹಾಯ ಮಾಡಲು ಕೇಳುತ್ತೀರಾ? ಇಲ್ಲದಿದ್ದರೆ, ದೇಶದಲ್ಲಿ ಕರಡಿ ಕುಣಿತ ಶುರುವಾಗಲಿದೆ ಎಂದು ಕಿಡಿಕಾರಿದ್ದಾರೆ.

ಪೆಗಾಸಸ್ ವಿಚಾರವಾಗಿ ಸುಪ್ರೀಂಕೋರ್ಟ್​ ಮೇಲ್ವಿಚಾರಣೆ ನಡೆಸಬೇಕೆಂದು ಕಾಂಗ್ರೆಸ್ ಒತ್ತಾಯಿಸಿದೆ.