ಪಾಕ್​​ ಮೂಲದ ಉಗ್ರ ಸಂಘಟನೆಗಳಿಂದ ದಾಳಿ ಭೀತಿ: ಅಸ್ಸೋಂನಲ್ಲಿ Red alert

ಅಸ್ಸೋಂನಲ್ಲಿ ಕೋಮುದ್ವೇಷ ಹರಡಿ ವಿದ್ವಂಸಕ ಕೃತ್ಯ ಎಸಗಲು ಐಎಸ್​​ಐ ಮತ್ತು ಅಲ್​ ಖೈದಾ ಸಂಘಟನೆ ಮುಂದಾಗಿದೆ ಎಂದು ಕೇಂದ್ರ ಗುಪ್ತಚರ ಇಲಾಖೆ ಆತಂಕಕಾರಿ ಮಾಹಿತಿ ನೀಡಿದೆ. ಈ ಹಿನ್ನೆಲೆ ರಾಜ್ಯದಲ್ಲಿ ರೆಡ್ ಅಲರ್ಟ್(Red alert) ಘೋಷಿಸಲಾಗಿದೆ.

ಗುವಾಹಟಿ(ಅಸ್ಸೋಂ):ರಾಜ್ಯದಲ್ಲಿ ಪಾಕಿಸ್ತಾನದ ಐಎಸ್​​ಐ ಮತ್ತು ಅಲ್​​​​ ಖೈದಾ ಸಂಘಟನೆ ವಿದ್ವಂಸಕ ಕೃತ್ಯ ಎಸಗಲು ಸಂಚು ರೂಪಿಸಿವೆ ಎಂಬ ಕೇಂದ್ರ ಗುಪ್ತಚರ ಇಲಾಖೆಯ ಎಚ್ಚರಿಕೆ ಬೆನ್ನಲ್ಲೇ ಪೊಲೀಸರು ರಾಜ್ಯಾದ್ಯಂತ ರೆಡ್ ಅಲರ್ಟ್ (Red alert) ಘೋಷಿಸಿದ್ದಾರೆ.

ಅಲ್ಪಸಂಖ್ಯಾತರನ್ನ ಗುರಿಯಾಗಿಸಿಕೊಂಡು​ ಉಗ್ರರು ದಾಳಿ ನಡೆಸುವ ಸಾಧ್ಯತೆ ಇದೆ ಎಂದು ಗುಪ್ತಚರ ಇಲಾಖೆ ಎಚ್ಚರಿಕೆ ರವಾನಿಸಿತ್ತು. ಈ ಹಿನ್ನೆಲೆ ಅಸ್ಸೋಂ ಪೊಲೀಸ್ ಪ್ರಧಾನ ಕಚೇರಿಯಲ್ಲಿ ಹಿರಿಯ ಅಧಿಕಾರಿಗಳು ಸಭೆ ನಡೆಸಿದ್ದು, ಜಿಲ್ಲೆಗಳಲ್ಲಿ ಯಾವುದೇ ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ ಕೈಗೊಳ್ಳಲು ಆಯಾ ಜಿಲ್ಲಾ ವರಿಷ್ಠಾಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಅಸ್ಸೋಂ ಪೊಲೀಸ್ ಎಡಿಜಿಪಿ (ಎಸ್‌ಬಿ) ಹಿರೇನ್ ನಾಥ್ ಈ ಕುರಿತು ಮಾತನಾಡಿ, ಗುವಾಹಟಿ ನಗರದ ಲಕ್ರಾದಲ್ಲಿ ಹೆಚ್ಚಿನ ಸಂಖ್ಯೆಯ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡ ನಂತರ ಅ. 6ರಂದು ಎಲ್ಲಾ ಎಸ್‌ಪಿಗಳಿಗೆ ತುರ್ತು ಸಂದೇಶವನ್ನು ಕಳುಹಿಸಲಾಗಿದೆ ಎಂದಿದ್ದಾರೆ. ಪೊಲೀಸ್ ಮಹಾನಿರ್ದೇಶಕರ ಕಚೇರಿಯಿಂದ ತುರ್ತು ಆದೇಶವನ್ನು ಹೊರಡಿಸಲಾಗಿದ್ದು, ಹೈ ಅಲರ್ಟ್​ ಘೋಷಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಇದಕ್ಕೂ ಮೊದಲು ಐಸಿಸ್ ಬಿಡುಗಡೆ ಮಾಡಿದ್ದ ವಿಡಿಯೋ ತುಣುಕೊಂದರಲ್ಲಿ ಅಸ್ಸೋಂ ಮುಸ್ಲಿಂಮರ ವಿರುದ್ಧದ ದಾಳಿಯ ಕುರಿತು ಪ್ರಸ್ತಾಪಿಸಿತ್ತು. ಅಸ್ಸೋಂನ ದರ್ರಾಂಗ್ ಜಿಲ್ಲೆಯಲ್ಲಿನ ಮುಸ್ಲಿಂಮರ ಸ್ಥಳಾಂತರ ವೇಳೆ ಕೋಮುವಾದ ಸೃಷ್ಟಿಸುವ ಜೊತೆಗೆ ವಿಶ್ವ ಇಸ್ಲಾಮಿಕ್ ರಾಷ್ಟ್ರಗಳ ವೇದಿಕೆ ಮೂಲಕ ವಿಶ್ವದಾದ್ಯಂತ ಪ್ರಚಾರ ಮಾಡುವ ಕಾರ್ಯ ಆರಂಭಿಸಿತ್ತು.

ಇದೀಗ ಮತ್ತೆ ಅಸ್ಸೋಂನಲ್ಲಿ ಕೋಮುದ್ವೇಷ ಹರಡಿ ವಿದ್ವಂಸಕ ಕೃತ್ಯ ಎಸಗಲು ಪಾಕಿಸ್ತಾನದ ಉಗ್ರ ಸಂಘಟನೆ ಮುಂದಾಗಿದೆ ಎಂದು ಕೇಂದ್ರ ಗುಪ್ತಚರ ಇಲಾಖೆ ಎಚ್ಚರಿಸಿದೆ.

ಇದನ್ನೂ ಓದಿ:ಇತ್ತೀಚೆಗಿನ ನಾಗರಿಕರ ಹತ್ಯೆ ಪ್ರಕರಣದಲ್ಲಿ ಕಾಶ್ಮೀರಿಗಳ ಪಾತ್ರವಿಲ್ಲ: ಫಾರೂಖ್ ಅಬ್ದುಲ್ಲಾ