ಟ್ಯಾಟೂ ಮೂಲಕ ಪೋಷಕರ ಮಡಿಲು ಸೇರಿದ ಮಾನಸಿಕ ಅಸ್ವಸ್ಥ ಬಾಲಕ

ಬಾಲಕನ ಕೈಯಲ್ಲಿ ಟ್ಯಾಟೂ ರೂಪದಲ್ಲಿದ್ದ ದೂರವಾಣಿ ನಂಬರ್​ಗೆ ಕರೆ ಮಾಡಿದ ರೈಲ್ವೆ ಸಿಬ್ಬಂದಿ ಮಾನಸಿಕ ಅಸ್ವಸ್ಥ ಬಾಲಕನನ್ನು ಪೋಷಕರ ಬಳಿ ಸೇರಿಸಿದ್ದಾರೆ.

ಥಾಣೆ: ಕೆಲವು ಬಾರಿ ಟ್ಯಾಟೂ ಸಹ ಪ್ರಯೋಜನವಾಗುತ್ತದೆ ಎಂಬುದಕ್ಕೆ ಇಲ್ಲೊಂದು ಘಟನೆ ಸಾಕ್ಷಿಯಾಗಿದೆ. ಮಾನಸಿಕ ಅಸ್ವಸ್ಥ ಬಾಲಕನ ಕೈಯಲ್ಲಿದ್ದ ಟ್ಯಾಟೂ ಆತನ ಪೋಷಕರನ್ನು ಕೇವಲ 24 ಗಂಟೆಯಲ್ಲಿ ಸೇರುವಂತೆ ಮಾಡಿದೆ.

ಬಾಲಕ ಅಂಕಿತ್​ ಎಂಬಾತ ಮಧ್ಯಪ್ರದೇಶ ರಾಜ್ಯದ ಜಬಲ್ಪುರ್​ ಮೂಲದವನಾಗಿದ್ದು ಪೋಷಕರೊಂದಿಗೆ ವಾಸವಾಗಿದ್ದ. ಆದರೆ ಅಚಾನಕ್​ ಎಂಬಂತೆ ಜಬಲ್ಪುರ್​ ರೈಲ್ವೆ ನಿಲ್ದಾಣದಿಂದ ಆತ ತಪ್ಪಿಸಿಕೊಂಡು ಮಹಾರಾಷ್ಟ್ರಕ್ಕೆ ಪ್ರಯಾಣ ಬೆಳೆಸಿದ್ದಾನೆ. ಬಳಿಕ ಥಾಣೆ ಜಿಲ್ಲೆಯ ಡೊಂಬಿವಿಲಿ ರೈಲ್ವೆ ನಿಲ್ದಾಣದಲ್ಲಿ ಇಳಿದುಕೊಂಡ ಅಂಕಿತ್​ ಅಡ್ಡಾಡಿದ್ದಿಯಾಗಿ ಓಡಾಡುತ್ತಿದ್ದ. ಇದನ್ನು ಕಂಡ ಅಲ್ಲಿನ ಅಧಿಕಾರಿಗಳು ಆತನನ್ನು ವಿಚಾರಿಸಿದ್ದಾರೆ. ಈ ವೇಳೆ ಆತ ಮಾನಸಿಕ ಅಸ್ವಸ್ಥ ಎಂದು ತಿಳಿದುಬಂದಿದೆ. ಇನ್ನು ಆತನ ಕೈಯಲ್ಲಿ ಟ್ಯಾಟೂ ರೂಪದಲ್ಲಿ ಹಾಕಿದ್ದ ಮೊಬೈಲ್​ ನಂಬರ್​ ಕಂಡುಬಂದಿದೆ. ತಕ್ಷಣವೇ ಆ ನಂಬರ್​ಗೆ ಕರೆ ಮಾಡಿದ ಅಧಿಕಾರಿಗಳಿಗೆ ನಿಜಾಂಶ ತಿಳಿದುಬಂದಿದೆ. ಆತನ ಪೋಷಕರು ಕರೆ ಸ್ವೀಕರಿಸಿ, ತಮ್ಮ ಮಗ ನಾಪತ್ತೆಯಾಗಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಈ ಹಿನ್ನೆಲೆಯಲ್ಲಿ ಶನಿವಾರದಂದು ಪೋಷಕರು ಮಹಾರಾಷ್ಟ್ರಕ್ಕೆ ಆಗಮಿಸಿ ಮಗನನ್ನು ಕರೆದುಕೊಂಡು ಹೋಗಿದ್ದಾರೆ. ಒಟ್ಟಾರೆಯಾಗಿ ಟ್ಯಾಟೂನಿಂದ ಬಾಲಕನೋರ್ವ ತನ್ನ ತಂದೆ-ತಾಯಿಯನ್ನು ಸೇರುವಂತಾಗಿದ್ದು ಮಾತ್ರ ನಿಜ.