ಮುಂಬೈ: ಮೊಹಮ್ಮದ್ ಐಮಾನ್ ಕೋಲಿ ಅದ್ಭುತ ಸ್ಪೀಡ್‌ಕ್ಯೂಬಿಂಗ್ ಕೌಶಲ್ಯ ಹೊಂದಿರುವ ಪ್ರತಿಭಾವಂತ ಬಾಲಕ. ಇನ್ನು ಈತ ಕೈಯಲ್ಲಿ ಮಾತ್ರವಲ್ಲದೇ ಪಾದದ ಸಹಾಯದಿಂದಲೂ ಕೆಲವೇ ಸೆಕೆಂಡುಗಳಲ್ಲಿ ರೂಬಿಕ್ಸ್ ಸಮಸ್ಯೆಯನ್ನು ಪರಿಹರಿಸಬಲ್ಲ. ಇದರಲ್ಲಿ ವಿಶೇಷವೆಂದರೆ ಈತ ಕಣ್ಣಿಗೆ ಬಟ್ಟೆ ಕಟ್ಟಿ ರೂಬಿಕ್ಸ್ ಸಮಸ್ಯೆ ಬಗೆಹರಿಸುತ್ತಾನೆ.
ಮುಂಬೈನ ಕಫ್ ಪೆರೇಡ್ ಪ್ರದೇಶದ 16 ವರ್ಷದ ಬಾಲಕ ಐಮಾನ್ ಕೇವಲ ಸಾಮಾನ್ಯ ಜನರನ್ನು ಮಾತ್ರವಲ್ಲದೇ ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರನ್ನೂ ಸಹ ಮೆಚ್ಚಿಸಿದ್ದಾನೆ. ಈ ಹುಡುಗನ ವಿಡಿಯೋವನ್ನು ಸಚಿನ್ ಶೇರ್ ಸಹ ಮಾಡಿದ್ದಾರೆ.
ರೂಬಿಕ್ ಸಮಸ್ಯೆ ಬಗೆಹರಿಸಬಲ್ಲ ಗಿನ್ನಿಸ್ ರೆಕಾರ್ಡ್ ಬ್ರೇಕರ್ ಈ ಬಗ್ಗೆ ಸಚಿನ್ ಹೇಳಿಕೆ ನೀಡಿದ್ದು "ಈ ಯುವಕನನ್ನು ಸ್ವಲ್ಪ ಸಮಯದ ಹಿಂದೆ ಭೇಟಿ ಮಾಡಿದ್ದೆ. ಅವನು ಕಣ್ಣುಮುಚ್ಚಿ ರೂಬಿಕ್ಸ್ ಸಮಸ್ಯೆ ಬಗೆಹರಿಸುವುದನ್ನು ಕಂಡು ನಾನು ಇನ್ನೂ ಆಶ್ಚರ್ಯಚಕಿತನಾಗಿದ್ದೇನೆ" ಎಂದು ಬರೆದಿದ್ದಾರೆ.
ಐಮನ್ 2019 ರಲ್ಲಿ ಗಿನ್ನೆಸ್ ವಿಶ್ವ ದಾಖಲೆ ಬರೆದಿದ್ದಾನೆ. ಈಗಾಗಲೇ ಇದ್ದ 16.56 ಸೆಕೆಂಡುಗಳ ರೆಕಾರ್ಡ್ ಅನ್ನು 15.56 ಸೆಕೆಂಡುಗಳಲ್ಲಿ ರೂಬಿಕ್ಸ್ ಬಗೆಹರಿಸುವ ಮೂಲಕ ದಾಖಲೆ ಮುರಿದಿದ್ದಾನೆ. ಐಮಾನ್ ಪ್ರಕಾರ, ರೂಬಿಕ್ಸ್ ಕ್ಯೂಬ್ ಬಗ್ಗೆ 9 ವರ್ಷವಿದ್ದಾಗಲೇ ಆಸಕ್ತಿ ಹುಟ್ಟಿತ್ತು. ನನ್ನ ಹವ್ಯಾಸವನ್ನು ಕಲೆಯನ್ನಾಗಿ ಪರಿವರ್ತಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದು ನನ್ನ ತಾಯಿ ತೆಹ್ಜೀಬ್ ಕೋಲಿ ಎಂದು ಹೇಳುತ್ತಾನೆ.
