'ದೇಶದ ಅತಿದೊಡ್ಡ ಪಕ್ಷವೇ ಗೂಂಡಾಗಿರಿಯಲ್ಲಿ ತೊಡಗಿದರೆ, ಜನರಿಗೆ ತಪ್ಪು ಸಂದೇಶ ರವಾನೆ'

ಕೇಂದ್ರದಲ್ಲಿ ಅಧಿಕಾರದಲ್ಲಿದ್ದು, ಇಂತಹ ಗೂಂಡಾಗಿರಿ ನಡೆಸಿದರೆ ಜನತೆಗೆ ಕೆಟ್ಟ ಸಂದೇಶ ರವಾನೆಯಾಗುತ್ತದೆ. ಯಾವುದನ್ನೇ ಸಾಧಿಸುವುದಾದರೂ ಜನತೆ ಇದೇ ಸರಿ ದಾರಿ ಎಂದು ಯೋಚಿಸುವಂತೆ ಆಗಲಿದೆ ಎಂದು ಅರವಿಂದ್​ ಕೇಜ್ರಿವಾಲ್​, ಬಿಜೆಪಿ ವಿರುದ್ಧ ಕುಟು ಟೀಕೆ ಮಾಡಿದ್ದಾರೆ.

ನವದೆಹಲಿ: ದೇಶದ ಅತಿದೊಡ್ಡ ಪಕ್ಷ (ಬಿಜೆಪಿ) ಗೂಂಡಾಗಿರಿಯಲ್ಲಿ ತೊಡಗಿದರೆ, ಅದರಿಂದ ಜನರಿಗೆ ತಪ್ಪು ಸಂದೇಶ ಹೋಗುತ್ತದೆ. ಇಂತಹ ಸನ್ನಿವೇಶದಲ್ಲಿ ದೇಶ ಪ್ರಗತಿ ಕಾಣಲು ಆಗುವುದಿಲ್ಲ ಎಂದು ದೆಹಲಿ ಮುಖ್ಯಮಂತ್ರಿ, ಆಮ್​ ಆದ್ಮಿ ಪಕ್ಷದ ರಾಷ್ಟ್ರೀಯ ಸಂಚಾಲಕ ಅರವಿಂದ್​ ಕೇಜ್ರಿವಾಲ್​ ಹೇಳಿದ್ದಾರೆ.

'ದಿ ಕಾಶ್ಮೀರ್​ ಫೈಲ್ಸ್​' ಚಿತ್ರದ ಕುರಿತಾದ ಹೇಳಿಕೆಯನ್ನು ಖಂಡಿಸಿ ಕೇಜ್ರಿವಾಲ್​ ನಿವಾಸ ಮುಂದೆ ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ತೇಜಸ್ವಿ ಸೂರ್ಯ ನೇತೃತ್ವದಲ್ಲಿ ಪಕ್ಷದ ಕಾರ್ಯಕರ್ತರು ಬುಧವಾರ ಪ್ರತಿಭಟನೆ ನಡೆಸಿದ್ದರು. ಈ ವೇಳೆ ನಿವಾಸದ ಹೊರಗಡೆಯ ಆಸ್ತಿಪಾಸ್ತಿಯನ್ನು ಹಾನಿ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಇದರ ಬೆನ್ನಲ್ಲೇ ಕೇಜ್ರಿವಾಲ್​ ಈ ಹೇಳಿಕೆ ನೀಡಿದ್ದಾರೆ.

'ಅರವಿಂದ್​ ಕೇಜ್ರಿವಾಲ್​ ಮುಖ್ಯವಲ್ಲ. ಆದರೆ, ರಾಷ್ಟ್ರ ಮುಖ್ಯ. ನಾನು ದೇಶಕ್ಕಾಗಿ ಪ್ರಾಣ ಕೊಡಬಲ್ಲೆ. ಗೂಂಡಾಗಿರಿಯಿಂದ ದೇಶದ ಪ್ರಗತಿಯಾಗಲ್ಲ. ದೇಶದ ಅತಿ ದೊಡ್ಡ ಪಕ್ಷವೇ ಕೇಂದ್ರದಲ್ಲಿ ಅಧಿಕಾರದಲ್ಲಿದ್ದು, ಇಂತಹ ಗೂಂಡಾಗಿರಿಯನ್ನು ನಡೆಸಿದರೆ ಜನತೆಗೆ ಕೆಟ್ಟ ಸಂದೇಶ ರವಾನೆಯಾಗುತ್ತದೆ. ಯಾವುದನ್ನೇ ಸಾಧಿಸಬೇಕೆಂದರೂ ಜನತೆ ಇದೇ ಸರಿ ದಾರಿ ಎಂದು ಯೋಚಿಸುವಂತೆ ಆಗಲಿದೆ' ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.

ಇದನ್ನೂ ಓದಿ:ತೈಲ ಬೆಲೆ ಏರಿಕೆ: ಪತ್ರಕರ್ತನ ಮೇಲೆ ಬಾಬಾ ರಾಮ್​ದೇವ್​ ಸಿಟ್ಟಾಗಿದ್ದೇಕೆ? ವಿಡಿಯೋ ನೋಡಿ