ದೇಶದ ವಿವಿಧೆಡೆ ಐಟಿ ದಾಳಿ: ಸಾವಿರ ಕೋಟಿಗೂ ಹೆಚ್ಚು ಕಡೆ ಅಕ್ರಮ ವ್ಯವಹಾರ ಬಯಲು

ಇಲ್ಲಿಯವರೆಗೆ 24 ಕೋಟಿ ರೂಪಾಯಿ ಲೆಕ್ಕಕ್ಕೆ ಸಿಗದ ನಗದು ಮತ್ತು 20 ಕೋಟಿ ರೂಪಾಯಿ ಮೌಲ್ಯದ ಚಿನ್ನಾಭರಣ ಇತ್ಯಾದಿಗಳನ್ನು ದಾಳಿ ವೇಳೆ ವಶಕ್ಕೆ ಪಡೆಯಲಾಗಿದೆ ಎಂದು ಐಟಿ ಅಧಿಕಾರಿಗಳು ಹೇಳಿದ್ದಾರೆ.

ನವದೆಹಲಿ:ಜವಳಿ, ರಾಸಾಯನಿಕಗಳು, ಪ್ಯಾಕೇಜಿಂಗ್, ರಿಯಲ್ ಎಸ್ಟೇಟ್ ಮತ್ತು ಶಿಕ್ಷಣದ ವೈವಿಧ್ಯಮಯ ಕ್ಷೇತ್ರಗಳಲ್ಲಿ ತೊಡಗಿರುವ ಪ್ರಮುಖ ವ್ಯಾಪಾರ ಸಮೂಹಗಳ ಮೇಲೆ ಜುಲೈ 20 ರಂದು ದಾಳಿ ನಡೆಸಿರುವುದಾಗಿ ಆದಾಯ ತೆರಿಗೆ ಇಲಾಖೆ ತಿಳಿಸಿದೆ.

ಈ ಐಟಿ ದಾಳಿ ವೇಳೆ ಸುಮಾರು ಸಾವಿರಕೋಟಿ ರೂ.ಗೂ ಅಧಿಕ ಲೆಕ್ಕ ಸಿಗದ ವಹಿವಾಟು ನಡೆದಿರುವುದು ಈ ಮಹತ್ವದ ದಾಳಿ ವೇಳೆ ತಿಳಿದು ಬಂದಿದೆ ಎಂದು ಆದಾಯ ತೆರಿಗೆ ಇಲಾಖೆ ನಿನ್ನೆ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ತಿಳಿಸಿದೆ. ಇಲ್ಲಿಯವರೆಗೆ 24 ಕೋಟಿ ರೂಪಾಯಿ ಲೆಕ್ಕಕ್ಕೆ ಸಿಗದ ನಗದು ಮತ್ತು 20 ಕೋಟಿ ರೂಪಾಯಿ ಮೌಲ್ಯದ ಚಿನ್ನಾಭರಣ ಇತ್ಯಾದಿಗಳನ್ನು ದಾಳಿ ವೇಳೆ ವಶಕ್ಕೆ ಪಡೆಯಲಾಗಿದೆ ಎಂದು ಐಟಿ ಅಧಿಕಾರಿಗಳು ಹೇಳಿದ್ದಾರೆ. ಖೇಡಾ, ಅಹಮದಾಬಾದ್, ಮುಂಬೈ, ಹೈದರಾಬಾದ್ ಮತ್ತು ಕೋಲ್ಕತ್ತಾದಲ್ಲಿ ಒಟ್ಟು 58 ಕಡೆ ಶೋಧ ಕಾರ್ಯ ನಡೆಸಲಾಗಿದೆ ಅವರು ಮಾಹಿತಿ ನೀಡಿದ್ದಾರೆ.

ಶೋಧ ಕಾರ್ಯಾಚರಣೆ ವೇಳೆ ಕೆಲ ಮಹತ್ವದ ದಾಖಲೆಗಳು ಮತ್ತು ಡಿಜಿಟಲ್ ಡೇಟಾ ರೂಪದಲ್ಲಿರುವ ಪುರಾವೆಗಳು ಕಂಡು ಬಂದಿವೆ. ಅವುಗಳೆಲ್ಲವನ್ನು ಐಟಿ ವಶಕ್ಕೆ ಪಡೆದುಕೊಂಡಿದೆ. ಖಾತೆಯ ಪುಸ್ತಕಗಳ ಹೊರಗೆ ಲೆಕ್ಕವಿಲ್ಲದ ನಗದು ಮಾರಾಟ, ನಕಲಿ ಖರೀದಿಗಳ ಬುಕಿಂಗ್ ಮತ್ತು ರಿಯಲ್ ಎಸ್ಟೇಟ್ ವಹಿವಾಟಿನ ರಸೀದಿಗಳು ಇದರಲ್ಲಿವೆ ಎಂದು ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ.

ಕೋಲ್ಕತ್ತಾ ಮೂಲದ ಶೆಲ್ ಕಂಪನಿಗಳಿಂದ ಷೇರು ಪ್ರೀಮಿಯಂ ಮೂಲಕ ಲೆಕ್ಕಕ್ಕೆ ಸಿಗದ ಮೊತ್ತದ ಲೇಯರಿಂಗ್‌ನಲ್ಲಿ ಗುಂಪೊಂದು ಭಾಗಿಯಾಗಿರುವುದು ಕಂಡುಬಂದಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ನಗದು ಆಧಾರಿತ 'ಸರಾಫಿ' (ಅಸುರಕ್ಷಿತ) ಮುಂಗಡಗಳ ಮೂಲಕ ಗಳಿಸಿದ ಲೆಕ್ಕವಿಲ್ಲದ ಆದಾಯದ ಕೆಲವು ನಿದರ್ಶನಗಳು ಐಟಿ ಅಧಿಕಾರಿಗಳಿಗೆ ಸಿಕ್ಕಿವೆ.

ಇದನ್ನು ಓದಿ;ಆರೋಗ್ಯ ವಿಮೆ ಪಾಲಿಸಿ ಇದ್ದರೆ ಸಕಾಲಕ್ಕೆ ರಿನ್ಯೂ ಮಾಡಿ.. ಅಪಾಯ ತಪ್ಪಿಸಿ