ಚಂಡೀಗಢ (ಪಂಜಾಬ್): ಭಾರತ ಮತ್ತು ಪಾಕಿಸ್ತಾನ ಗಡಿದಲ್ಲಿ ಅಕ್ರಮ ಮಾದಕ ವಸ್ತು ಸಾಗಣೆ ಯತ್ನ ಮುಂದುವರೆದಿದೆ. ಕೋಟ್ಯಾಂತರ ರೂಪಾಯಿ ಮೌಲ್ಯದ ಹೆರಾಯಿನ್ಅನ್ನು ಹೊತ್ತ ಬರುತ್ತಿದ್ದ ಮತ್ತೊಂದು ಹೈಟೆಕ್ ಡ್ರೋನ್ಅನ್ನು ಭದ್ರತಾ ಸಿಬ್ಬಂದಿ ಹೊಡೆದುರುಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಕಳೆದ ಎರಡು ತಿಂಗಳೊಳಗೆ ಪತ್ತೆಯಾದ ಆರನೇ ಡ್ರೋನ್ ಇದಾಗಿದೆ.
ಇದನ್ನೂ ಓದಿ:ಗಡಿಯಾಚೆಗಿನ ಡ್ರಗ್ಸ್ ದಂಧೆಯ ಕಿಂಗ್ ಪಿನ್ಗಳ ಸೆರೆ: 10 ಕೆಜಿ ಹೆರಾಯಿನ್, 20 ಲಕ್ಷದ ಅಮೆರಿಕನ್ ಡ್ರೋನ್ ಜಪ್ತಿ
ಶನಿವಾರ ಮತ್ತು ಭಾನುವಾರದ ಮಧ್ಯರಾತ್ರಿ ಭಾರತ ಹಾಗೂ ಪಾಕಿಸ್ತಾನದ ಗಡಿಯಲ್ಲಿ ಅಮೃತಸರ ಗ್ರಾಮಾಂತರ ಪೊಲೀಸರು ಡ್ರೋನ್ ಚಲನೆಯನ್ನು ಗಮನಿಸಿದ್ದಾರೆ. ಆಗ ತಕ್ಷಣವೇ ಎಚ್ಚೆತ್ತುಕೊಂಡು ಗಡಿ ಭದ್ರತಾ ಪಡೆ (ಬಿಎಸ್ಎಫ್) ಯೋಧರೊಂದಿಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ನಂತರ ಪಂಜಾಬ್ ಪೊಲೀಸರು ಹಾಗೂ ಬಿಎಸ್ಎಫ್ ಸೈನಿಕರು ಜಂಟಿಯಾಗಿ ತೀವ್ರ ಶೋಧ ಕಾರ್ಯಾಚರಣೆ ನಡೆಸಿದ್ದಾರೆ.
ಗಡಿಯಿಂದ ಕೇವಲ 2 ಕಿಮೀ ಡ್ರೋನ್ ಪತ್ತೆ: ಇಂಡೋ-ಪಾಕ್ ಗಡಿಯಿಂದ ಕೇವಲ 2 ಕಿಮೀ ದೂರದಲ್ಲಿರುವ ಕಕ್ಕರ್ ಗ್ರಾಮದ ಬಳಿ ಡ್ರೋನ್ ಚಲನವಲನ ಪತ್ತೆಯಾಗಿದೆ. ಅಂತೆಯೇ, ಶೋಧ ಕಾರ್ಯವನ್ನು ಪೊಲೀಸರು ಹಾಗೂ ಬಿಎಸ್ಎಫ್ ಯೋಧರು ಚುರುಕುಗೊಳಿಸಿದ್ದಾರೆ. ಈ ವೇಳೆ ಪೊಲೀಸರು ಎಕೆ 47 ಗನ್ನಿಂದ 12 ಸುತ್ತು ಗುಂಡಿನ ದಾಳಿ ಮಾಡಿ ಡ್ರೋಣ್ನನ್ನು ಹೊಡೆದುರುಳಿಸಿದ್ದಾರೆ. ಅಲ್ಲದೇ, ಡ್ರೋಣ್ ಹೊತ್ತು ತರುತ್ತಿದ್ದ ಐದು ಕೆಜಿ ಹೆರಾಯಿನ್ಅನ್ನು ಜಪ್ತಿ ಮಾಡಲಾಗಿದೆ ಎಂದು ಪಂಜಾಬ್ ಪೊಲೀಸ್ ಮಹಾನಿರ್ದೇಶಕ ಗೌರವ್ ಯಾದವ್ ತಿಳಿಸಿದ್ದಾರೆ.
10 ಲಕ್ಷ ಮೌಲ್ಯದ ಹೈಟೆಕ್ ಡ್ರೋನ್:ಭದ್ರತಾ ಪಡೆಗಳು ಹೊಡೆದುರುಳಿಸಿರುವ ಹೆಕ್ಸಾಕಾಪ್ಟರ್ ಡ್ರೋನ್ ಹೈಟೆಕ್ ಆಗಿದ್ದು, ಇದರ ಮಾರುಕಟ್ಟೆ ಮೌಲ್ಯ 10 ಲಕ್ಷ ರೂಪಾಯಿ. ಅಲ್ಲದೇ, ಇದು ರೆಕ್ಕೆಗಳ ಡ್ರೋನ್ ಆಗಿದ್ದು, ಅಮೆರಿಕ ಮತ್ತು ಚೀನಾದಲ್ಲಿ ತಯಾರಿಸಿದ ಬಿಡಿಭಾಗಗಳೊಂದಿಗೆ ಜೋಡಿಸಿ ಸಿದ್ಧಪಡಿಸಲಾಗಿದೆ ಎಂದು ಐಜಿಪಿ ಗೌರವ್ ಯಾದವ್ ಹೇಳಿದ್ದಾರೆ. ಇಷ್ಟೇ ಅಲ್ಲ, ಈ ಡ್ರೋಣ್ ದೀರ್ಘಾವಧಿಯ ಬ್ಯಾಟರಿ ಬ್ಯಾಕಪ್ ಮತ್ತು ಇನ್‌ಫ್ರಾರೆಡ್ ಆಧಾರಿತ ಕತ್ತಲೆಯ ದೃಶ್ಯಗಳನ್ನು ಸೆರೆಹಿಡಿಯುವ ಕ್ಯಾಮರಾ ಹೊಂದಿದೆ. ಜೊತೆಗೆ ಜಿಪಿಎಸ್ ಸಿಸ್ಟಮ್ ಸೇರಿದಂತೆ ಹೈಟೆಕ್ ವೈಶಿಷ್ಟ್ಯಗಳು ಈ ಡ್ರೋನ್ನಲ್ಲಿವೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಸೆರೆಸಿಕ್ಕಿ ಇಬ್ಬರು ಆರೋಪಿಗಳು:ಈ ಬಗ್ಗೆ ಹೆಚ್ಚಿನ ವಿವರಗಳನ್ನು ಅಮೃತಸರ ಗ್ರಾಮಾಂತರ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ (ಎಸ್‌ಎಸ್‌ಪಿ) ಸ್ವಪನ್ ಶರ್ಮಾ ನೀಡಿದ್ದು, ಈ ಕಾರ್ಯಾಚರಣೆ ಸಂಬಂಧದಲ್ಲಿ ಇಬ್ಬರು ಆರೋಪಿಗಳು ಸಿಕ್ಕಿಬಿದ್ದಿದ್ದಾರೆ. ಈ ಖದೀಮರು ತಪ್ಪಿಸಿಕೊಳ್ಳಲು ಪ್ರಯತ್ನಿಸುತ್ತಿರುವಾಗ ಪೊಲೀಸರು ಸುತ್ತುವರೆದು ಹಿಡಿದಿದ್ದಾರೆ. ಈ ಡ್ರೋನ್ ಮೂಲಕ ಹೆರಾಯಿನ್ ರವಾನಿಸಿ ಪಾಕ್ ಕಳ್ಳಸಾಗಣೆದಾರರು ಮತ್ತು ಹೆರಾಯಿನ್ ಭಾರತದ ಗಡಿಯಲ್ಲಿ ಸ್ವೀಕರಿಸಲು ಸಜ್ಜಾಗಿದ್ದ ಭಾರತೀಯ ಸಹಚರರನ್ನು ಪತ್ತೆ ಹೆಚ್ಚಲು ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ವಿವರಿಸಿದರು.
ಈ ಬಗ್ಗೆ ಅಮೃತಸರ ಗ್ರಾಮಾಂತರದ ಲೋಪೋಕ್‌ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ. ಇನ್ನು, ಇದೇ ತಿಂಗಳ 15ರಂದು ಹೆರಾಯಿನ್ಅನ್ನು ಹೊತ್ತ ಬರುತ್ತಿದ್ದ ಡ್ರೋಣ್ ಭದ್ರತಾ ಸಿಬ್ಬಂದಿ ಹೊಡೆದುರುಳಿಸಿ, ಸುಮಾರು 30 ಕೋಟಿ ಮೌಲ್ಯದ ಹೆರಾಯಿನ್ ವಶಕ್ಕೆ ಪಡೆದಿದ್ದರು. ಕಳೆದ 15ರಂದು ಅಕ್ರಮ ಮಾದಕ ವಸ್ತು ದಂಧೆಯ ಇಬ್ಬರು ಕಿಂಗ್ ಪಿನ್ಗಳ ಸಮೇತವಾಗಿ 10 ಕೆಜಿ ಹೆರಾಯಿನ್ ಹಾಗೂ ಅಮೆರಿಕದಲ್ಲಿ ನಿರ್ಮಿತ ಡ್ರೋನ್ಅನ್ನು ಜಪ್ತಿ ಮಾಡಲಾಗಿತ್ತು.
ಇದನ್ನೂ ಓದಿ:ಪಾಕ್ ಗಡಿಯಲ್ಲಿ ಡ್ರೋನ್ ಹೊಡೆದುರುಳಿಸಿ 30 ಕೋಟಿ ಮೌಲ್ಯದ ಹೆರಾಯಿನ್ ಜಪ್ತಿ
