ಇತಿಹಾಸದಲ್ಲಿ ಸ್ನಾತಕೋತ್ತರ ವ್ಯಾಸಂಗ ಮಾಡುತ್ತಿದ್ದ ವೇಳೆ ವಿನೋದ್ ದೀಕ್ಷಿತ್‌ರನ್ನ ಮೊದಲ ಬಾರಿ ನೋಡಿ ಫಿದಾ ಆಗಿದ್ದರಂತೆ ಶೀಲಾ ದೀಕ್ಷಿತ್. ಆದ್ರೆ ವಿನೋದ್ ಪರಿಚಯ ಅವರಿಗಿಲ್ಲ. ಆದ್ರೆ ಅವರ ಸ್ನೇಹಿತೆಯ ಪ್ರಿಯಕರನ ಗೆಳೆಯ ವಿನೋದ್ ಆಗಿದ್ದರು. ಶೀಲಾ ಸ್ನೇಹಿತೆ ಹಾಗೂ ವಿನೋದ್ ಅವರ ಸ್ನೇಹಿತ ಪರಸ್ಪರ ಪ್ರೇಮದಲ್ಲಿದ್ದರು. ಇವರ ಜಗಳ ಸರಿಪಡಿಸಲು ವಿನೋದ್ ಹಾಗೂ ಶೀಲಾ ಮುಂದಾದರು. ಆದ್ರೆ, ಅವರ ನಡುವಿನ ವೈಮನಸ್ಯ ಮಾತ್ರ ಸರಿಯಾಗಲಿಲ್ಲ. ಆದ್ರೆ, ನಮ್ಮ ಸ್ನೇಹ ಆರಂಭವಾಯಿತು ಎಂದು ಶೀಲಾ ದಿಕ್ಷಿತ್ ಸಂದರ್ಶನವೊಂದರಲ್ಲಿ ಹೇಳಿದ್ದರು.
ಆ ಘಟನೆಯ ಬಳಿಕ ನಾವು ಜತೆಯಲ್ಲೇ ಓಡಾಡುತ್ತಿದ್ದೆವು. ಪರಸ್ಪರ ಉತ್ತಮ ಸ್ನೇಹಿತರಾಗಿದ್ದೆವು. ಎಂಎ ತರಗತಿಯ ಪರೀಕ್ಷೆಗಳು ಮುಗಿದ ಬಳಿಕ ನಾನು ಹತ್ತಿದ ಬಸ್ಸನ್ನೇ ವಿನೋದ್ ಹತ್ತಿ ಪಕ್ಕದಲ್ಲಿ ಕುಳಿತುಕೊಂಡರು. ಆಗ ಅವರು, ನಾನು ಮದುವೆಯಾಗುವ ಹುಡುಗಿ ಸಿಕ್ಕಿದ್ದಾಳೆಂದು ನನ್ನ ತಾಯಿ ಬಳಿ ಹೇಳಿದ್ದೆ. ಅದಕ್ಕೆ ನನ್ನ ತಾಯಿ, ನಾನು ಆ ಹುಡುಗಿ ಅಭಿಪ್ರಾಯ ಕೇಳಿದ್ದೀಯಾ? ಅಂತಾ ಪ್ರಶ್ನಿಸಿದ್ದರು. ಇಲ್ಲ,ಆದ್ರೆ ಆ ಹುಡುಗಿ ನನ್ನ ಪಕ್ಕದಲ್ಲೇ ಕುಳಿತುಕೊಂಡಿದ್ದಾಳೆ ಎಂದು ವಿನೋದ್ ಹೇಳಿದಾಗ ಒಂದು ಕಡೆ ಅಳು, ಮತ್ತೊಂದು ಕಡೆ ಸಂತಸದಿಂದ ಆತನನ್ನು ಗಟ್ಟಿಯಾಗಿ ಅಪ್ಪಿಕೊಂಡೆ ಎಂದು ಶೀಲಾ ದೀಕ್ಷಿತ್ ಹೇಳುತ್ತಾರೆ.