ತಿರುವಾಂಕೂರು ರಾಜಮನೆತನಕ್ಕೆ ಒಲಿದ ಶ್ರೀ ಪದ್ಮನಾಭ ಸ್ವಾಮಿ... ಇದು ಸುಪ್ರೀಂ ಆಜ್ಞೆ!

ಕೇರಳದ ಶ್ರೀ ಪದ್ಮನಾಭ ಸ್ವಾಮಿ ದೇಗುಲದ ಆಡಳಿತ ಮಂಡಳಿ ವಿವಾದ ಸಂಬಂಧ ಸುಪ್ರೀಂಕೋರ್ಟ್​ ಮಹತ್ವದ ತೀರ್ಪು ನೀಡಿದೆ.

ನವದೆಹಲಿ:ದೇವಸ್ಥಾನದ ಆಡಳಿತದಲ್ಲಿ ತಿರುವಾಂಕೂರು ರಾಜಮನೆತನದ ಹಕ್ಕನ್ನು ಸುಪ್ರೀಂಕೋರ್ಟ್​ ಎತ್ತಿ ಹಿಡಿದಿದೆ. ಜಸ್ಟಿಸ್​ ಯು.ಯು. ಲಲಿತ್ ಮತ್ತು ಜಸ್ಟಿಸ್​ ಇಂದು ಮಲ್ಹೋತ್ರಾ ಅವರ ದ್ವಿ ಸದಸ್ಯ ನ್ಯಾಯಪೀಠವು ತಿರುವಾಂಕೂರು ರಾಜಮನೆತನದ ಪರವಾಗಿ ತೀರ್ಪು ನೀಡಿತು. ದೇವಾಲಯದ ನಿರ್ವಹಣೆಯನ್ನು ತಿರುವಾಂಕೂರು ರಾಜವಂಶಕ್ಕೆ ವಹಿಸಿತು. ಸದ್ಯದ ಮಟ್ಟಿಗೆ ಮಧ್ಯಂತರ ಸಮಿತಿಯನ್ನು ರಚಿಸಲು ಸುಪ್ರೀಂ ಸೂಚಿಸಿದೆ. ತಿರುವನಂತಪುರ ಜಿಲ್ಲಾ ನ್ಯಾಯಾಧೀಶರು ಈ ಸಮಿತಿಯ ನೇತೃತ್ವ ವಹಿಸಲಿದ್ದಾರೆ. ಹೊಸ ಸಮಿತಿ ರಚನೆಯಾಗುವವರೆಗೂ ಮಧ್ಯಂತರ ಸಮಿತಿ ದೇವಸ್ಥಾನದ ವ್ಯವಹಾರವನ್ನು ನೋಡಿಕೊಳ್ಳಲಿದೆ.

ವಿವಾದವೇನು?

18ನೇ ಶತಮಾನದಲ್ಲಿ ತಿರುವಾಂಕೂರು ರಾಜಮನೆತನದವರು ನಿರ್ಮಿಸಿದ್ದ ದೇಗುಲವನ್ನು ಸ್ವಾತಂತ್ರ್ಯಾನಂತರವೂ ರಾಜಮನೆತನದವರೇ ಟ್ರಸ್ಟ್​ ರಚಿಸಿಕೊಂಡು ನೋಡಿಕೊಳ್ಳುತ್ತಿದ್ದರು. ಆದರೆ ದೇಗುಲದ ನಿರ್ವಹಣೆಗೆ ಪ್ರತ್ಯೇಕ ಟ್ರಸ್ಟ್​ ರಚಿಸಿ, ದೇಗುಲ ವಶಕ್ಕೆ ಪಡೆಯಬೇಕೆಂದು 2011ರ ಜನವರಿ 31ರಂದು ಕೇರಳ ಹೈಕೋರ್ಟ್​ ತೀರ್ಪು ನೀಡಿತ್ತು.

9 ವರ್ಷಗಳ ನಂತರ ತೀರ್ಪು

ಕೇರಳ ಹೈಕೋರ್ಟ್​ ನಿರ್ಧಾರ ಪ್ರಶ್ನಿಸಿ ತಿರುವಾಂಕೂರು ರಾಜಮನೆತನದವರು ಸುಪ್ರೀಂಕೋರ್ಟ್​ ಮೊರೆ ಹೋಗಿದ್ದರು. ಸುಮಾರು 9 ವರ್ಷಗಳ ನಂತರ ಇವತ್ತು ಸುಪ್ರೀಂಕೋರ್ಟ್​ ತೀರ್ಪು ನೀಡಿದ್ದು, ಸುದೀರ್ಘ ಹೋರಾಟದಲ್ಲಿ ರಾಜಮನೆತನದ ಕೈ ಮೇಲಾಗಿದೆ.

ಅನಂತ ಪದ್ಮನಾಭ ದೇವಸ್ಥಾನದ ನೆಲಮಾಳಿಗೆಯಲ್ಲಿ ಆರು ರಹಸ್ಯ ಕೋಣೆಗಳಿವೆ. ಈ ಕೊಠಡಿಗಳಲ್ಲಿ ಚಿನ್ನಾಭರಣಗಳಿವೆ ಎಂದು ಹೇಳಲಾಗಿದೆ.