ಕೊರೊನಾ ಭೀತಿ: ತಾಜ್​ಮಹಲ್​, ಮುಂಬೈ ಸಿದ್ಧಿವಿನಾಯಕ ದೇಗುಲ ಇಂದಿನಿಂದ ಬಂದ್​!

ಪ್ರಪಂಚದಾದ್ಯಂತ ಕರಿನೆರಳು ಬೀರಿರುವ ಮಹಾಮಾರಿ ಕೊರೊನಾ ಭಾರತದ ಎಲ್ಲ ಉದ್ದಿಮೆಗಳ ಮೇಲೂ ವ್ಯಾಪಕ ಪರಿಣಾಮ ಬಿರಿದ್ದು, ಪ್ರವಾಸೋದ್ಯಮ ಇಲಾಖೆ ಮೇಲೆ ಹೆಚ್ಚಿನ ಪರಿಣಾಮ ಬೀರಿದೆ.

ಮುಂಬೈ/ಆಗ್ರಾ:ಮಹಾಮಾರಿ ಕೊರೊನಾ ವೈರಸ್​​ನಿಂದ ಇಡೀ ವಿಶ್ವವೇ ತತ್ತರಿಸಿ ಹೋಗಿದ್ದು, ಡೆಡ್ಲಿ ವೈರಾಣುವಿನಿಂದ ಭಾರತದಲ್ಲೂ ಆತಂಕ ಶುರುವಾಗಿದೆ. ಮಾರಕ ಸೋಂಕಿನ ವಿರುದ್ಧ ಹೋರಾಡಲು ಈಗಾಗಲೇ ಅನೇಕ ಕ್ರಮ ಕೈಗೊಳ್ಳಲಾಗಿದೆ.

ಈಗಾಗಲೇ ಶಾಲೆ, ಕಾಲೇಜ್​, ಸಿನಿಮಾ ಹಾಲ್,ಮಾಲ್​, ಪಬ್​​,ಪಾರ್ಕ್​​​ ಸೇರಿದಂತೆ ಜನಸಂದಣಿ ಇರುವ ಜಾಗಗಳಲ್ಲಿ ಯಾರು ಸೇರದಂತೆ ಆದೇಶ ಹೊರಡಿಸಲಾಗಿದೆ. ಇದರ ಮಧ್ಯೆ ಇದೀಗ ದೇಶದ ಪ್ರಮುಖ ಪ್ರವಾಸಿ ತಾಣಗಳಾಗಿರುವ ಆಗ್ರಾದ ತಾಜ್​ಮಹಲ್​ ಹಾಗೂ ಮುಂಬೈನ ಸಿದ್ಧಿವಿನಾಯಕ ದೇವಸ್ಥಾನಗಳು ಸ್ಥಗಿತಗೊಳ್ಳಲಿವೆ.

ಸಿದ್ಧಿವಿನಾಯಕ ದೇವಸ್ಥಾನ ಇಂದಿನಿಂದ ಬಂದ್​​ ಮಾಡಲು ಅಲ್ಲಿನ ಆಡಳಿತ ಮಂಡಳಿ ನಿರ್ಧಾರ ಕೈಗೊಂಡಿದ್ದು, ದಿನದಿಂದ ದಿನಕ್ಕೆ ವೈರಸ್​ ಏರಿಕೆ ಕಾಣುತ್ತಿರುವ ಕಾರಣ ಈ ನಿರ್ಧಾರ ಕೈಗೊಂಡಿದ್ದಾಗಿ ತಿಳಿಸಿದ್ದಾರೆ. ಮುಂದಿನ ಆದೇಶ ಹೊರಬೀಳುವವರೆಗೂ ಈ ನಿಯಮ ಜಾರಿಯಲ್ಲಿರುವುದಾಗಿ ತಿಳಿಸಲಾಗಿದ್ದು, ಭಕ್ತರು ಭೇಟಿ ನೀಡದಂತೆ ಸೂಚನೆ ನೀಡಲಾಗಿದೆ.

ಭಾರತದಲ್ಲಿ 114 ಜನರಲ್ಲಿ ಕೊರೊನಾ ಮಹಾಮಾರಿ ಕಾಣಿಸಿಕೊಂಡಿರುವ ಕಾರಣ ಉತ್ತರಪ್ರದೇಶದ ಆಗ್ರಾದಲ್ಲಿರುವ ತಾಜ್​ಮಹಲ್​ ಕೂಡ ಬಂದ್​​ ಮಾಡಲಾಗಿದೆ.