ಭಾರತ-ಬಾಂಗ್ಲಾ ಕ್ರಿಕೆಟ್‌ ಸರಣಿ: ವೆಟೋರಿ ನೇತೃತ್ವದಲ್ಲಿ ಶಕೀಬ್ ಪಡೆ ಸಮರಾಭ್ಯಾಸ

ಟೀಂ ಇಂಡಿಯಾ ವಿರುದ್ಧ ನಡೆಯಲಿರುವ ಕ್ರಿಕೆಟ್​ ಸರಣಿಯಲ್ಲಿ ಬಾಂಗ್ಲಾ ಕ್ರಿಕೆಟ್​ ತಂಡ ಭಾಗಿಯಾಗಲಿದ್ದು ಆಟಗಾರರು ಹೊಸ ಬೌಲಿಂಗ್​ ಕೋಚ್​​ ನೇತೃತ್ವದಲ್ಲಿ ಕಠಿಣ ಅಭ್ಯಾಸ ನಡೆಸುತ್ತಿದ್ದಾರೆ.

ಢಾಕಾ: ನವೆಂಬರ್​ 3ರಿಂದ ಭಾರತ-ಬಾಂಗ್ಲಾ ಕ್ರಿಕೆಟ್ ಸರಣಿ ಆರಂಭಗೊಳ್ಳಲಿದೆ. ಈ ನಿಟ್ಟಿನಲ್ಲಿ ಬಾಂಗ್ಲಾ ತಂಡ ನೂತನ ಕೋಚ್‌ ನೇತೃತ್ವದಲ್ಲಿ ವಿಶೇಷ ತರಬೇತಿ ಶಿಬಿರದಲ್ಲಿ ಪಾಲ್ಗೊಂಡಿದೆ.

ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಬಾಂಗ್ಲಾದೇಶ ಕ್ರಿಕೆಟಿಗರು ಪ್ರತಿಭಟನೆ ನಡೆಸುತ್ತಿದ್ದ ಕಾರಣ, ಭಾರತ ವಿರುದ್ಧ ಕ್ರಿಕೆಟ್​ ಸರಣಿ ನಡೆಯುವುದು ಅನುಮಾನ ಎಂದೇ ಹೇಳಲಾಗಿತ್ತು. ಆದರೆ, ಬಿಸಿಬಿ 13 ಬೇಡಿಕೆಗಳಲ್ಲಿ 11ನ್ನು ಈಡೇರಿಸಲು ಒಪ್ಪಿಗೆ ಸೂಚಿರುವ ಕಾರಣ ಕ್ರಿಕೆಟರ್ಸ್​ ಪ್ರತಿಭಟನೆ ಹಿಂಪಡೆದುಕೊಂಡಿದ್ದಾರೆ. ಈ ಮೂಲಕ ಭಾರತ ಬಾಂಗ್ಲಾ ಸರಣಿ ನಡೆಯುವುದು ಖಚಿತವಾಗಿದೆ.

ಟೀಂ ಇಂಡಿಯಾ ವಿರುದ್ಧದ ಸರಣಿಗೆ ಬಾಂಗ್ಲಾ ಆಟಗಾರರಿಗೆ ತರಬೇತಿ

ಈ ಹಿಂದೆ ತಂಡದ ಬೌಲಿಂಗ್​ ಕೋಚ್​ ಆಗಿದ್ದ ಭಾರತೀಯ ಸುನಿಲ್​ ಜೋಶಿ ಸ್ಥಾನಕ್ಕೆ ಹೊಸದಾಗಿ ಆಯ್ಕೆಗೊಂಡಿರುವ ​​ ಡೇನಿಯಲ್​​​​​ ವೆಟೋರಿ ಅಡಿಯಲ್ಲಿ ತಂಡ ಟ್ರೈನಿಂಗ್ ಪಡೆದುಕೊಳ್ತಿದೆ. ಟಿ-20 ಕ್ಯಾಪ್ಟನ್​ ಶಕೀಬ್​ ಅಲ್​ ಹಸನ್ ಅನಾರೋಗ್ಯದ ಕಾರಣ ತರಬೇತಿ ವೇಳೆ ಕಾಣಿಸಿಕೊಂಡಿಲ್ಲ. ಉಳಿದಂತೆ ಎಲ್ಲಾ ಪ್ಲೇಯರ್ಸ್​​ಗೆ ಮುಖ್ಯ ಕೋಚ್​ ರಸ್ಸೆಲ್ ಡೊಮಿಂಗೊ ಹಾಗೂ ವೆಟೋರಿ ಗೆಲುವಿನ ಮಂತ್ರ ಹೇಳಿಕೊಡುತ್ತಿದ್ದು, ಟೀಂ ಇಂಡಿಯಾ ವಿರುದ್ಧದ ಹೋರಾಟಕ್ಕೆ ತಂಡ ಸಜ್ಜುಗೊಳ್ತಿದೆ.

ಡೆನಿಯಲ್​ ವೆಟೋರಿ ಬಾಂಗ್ಲಾ ಕ್ರಿಕೆಟಿಗರ ಅಭ್ಯಾಸ

ನವೆಂಬರ್​ 3ರಿಂದ ಆರಂಭಗೊಳ್ಳಲಿರುವ ಕ್ರಿಕೆಟ್​ ಸರಣಿಯಲ್ಲಿ ಮೂರು ಟಿ-20, ಎರಡು ಟೆಸ್ಟ್​​ ಪಂದ್ಯಗಳು ನಡೆಯಲಿವೆ. ಇದಕ್ಕಾಗಿ ಈಗಾಗಲೇ ಟೀಂ ಇಂಡಿಯಾ ತಂಡ ಪ್ರಕಟಗೊಂಡಿದ್ದು, ಟಿ-20 ತಂಡವನ್ನು ರೋಹಿತ್​ ಶರ್ಮಾ ಹಾಗೂ ಟೆಸ್ಟ್​ ತಂಡವನ್ನು ಕೊಹ್ಲಿ ಮುನ್ನಡೆಸಲಿದ್ದಾರೆ.