ಅಮೇಠಿ, ರಾಯ್‌ಬರೇಲಿ ಜನ ಭಿಕ್ಷೆ ಬೇಡಲ್ಲ- ಸಚಿವೆ ಸ್ಮೃತಿ ಇರಾನಿಗೆ ಪ್ರಿಯಾಂಕಾ ತಿರುಗೇಟು!

ಅಮೇಥಿಯಲ್ಲಿ ರಾಹುಲ್ ವಿರುದ್ಧ 2ನೇ ಬಾರಿ ಸ್ಪರ್ಧಿಸಿರುವ ಕೇಂದ್ರ ಸಚಿವೆ ಸ್ಮೃತಿ ಇರಾನಿಗೆ ರಾಹುಲ್ ಸೋದರಿ ಪ್ರಿಯಾಂಕಾ ಗಾಂಧಿ ಟಾಂಗ್ ನೀಡಿದ್ದಾರೆ.

ಅಮೇಥಿ, (ಯುಪಿ) : ರಾಯ್‌ಬರೇಲಿ ಮತ್ತು ಅಮೇಠಿ ಜನರು ಸ್ವಾಭಿಮಾನಿಗಳು. ಯಾರಿಂದಲೂ ಭಿಕ್ಷೆ ಬೇಡುವ ಮನಸ್ಥಿತಿಯವರಲ್ಲ ಅಂತಾ ಹೇಳುವ ಮೂಲಕ ಕಾಂಗ್ರೆಸ್ ಮುಖಂಡೆ ಪ್ರಿಯಾಂಕಾ ಗಾಂಧಿ, ಕೇಂದ್ರ ಸಚಿವೆ ಸ್ಮೃತಿ ಇರಾನಿಗೆ ತಿರುಗೇಟು ನೀಡಿದ್ದಾರೆ.

ಅಮೇಠಿಯಲ್ಲಿ ಚುನಾವಣಾ ರಾಲಿಯಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ ಇಲ್ಲಿಗೆ ಎಷ್ಟು ಸಾರಿ ಬಂದು ಹೋಗ್ತಾರೆ ಅನ್ನೋದು ಎಲ್ಲರಿಗೂ ಗೊತ್ತಿದೆ. ಯಾರ ಹೃದಯದಲ್ಲಿ ಅಮೇಠಿ ಇದೆ, ಇನ್ಯಾರ ಮನಸ್ಸಿನಲ್ಲಿ ಇಲ್ಲ ಅನ್ನೋದು ಇಲ್ಲಿನ ಜನರಿಗೆ ಗೊತ್ತಿದೆ. ಆದರೆ, ಆಶ್ಚರ್ಯ ಏನಂದ್ರೇ, ಸ್ಮೃತಿ ಇರಾನಿ ಇಲ್ಲಿಗೆ ಬಂದು ಸುಳ್ಳು ಹೇಳಿ ಹೋಗ್ತಾರೆ. ಇಲ್ಲಿನ ಜನರಿಗೆ ಹಾಕಿಕೊಳ್ಳೋದಕ್ಕೆ ಶೂಗಳೇ ಇಲ್ಲ ಅಂತಾ ಹೇಳ್ತಾರೆ. ಇಂತಹ ಮಾತುಗಳನ್ನ ಆಡುವ ಮೂಲಕ, ಸ್ಮೃತಿ ಇರಾನಿ ಅವರು ಬರೀ ರಾಹುಲ್ ಗಾಂಧಿಯನ್ನ ಅಪಮಾನಿಸಿಲ್ಲ, ಅಮೇಠಿ ಇಲ್ಲಿನ ಜನರಿಗೆ ಅಪಮಾನ ಮಾಡಿದ್ದಾರೆ. ಅಮೇಠಿ ಹಾಗೂ ರಾಯ್‌ಬರೇಲಿ ಜನ ಯಾರಿಂದಲೂ ಭಿಕ್ಷೆ ಬೇಡೋರಲ್ಲ. ಇಲ್ಲಿನ ಜನರಿಗೆ ಎಲ್ಲ ಸತ್ಯ ಗೊತ್ತಿದೆ ಅಂತಾ ಬಿಜೆಪಿ ಅಭ್ಯರ್ಥಿ ಸ್ಮೃತಿ ಇರಾನಿಗೆ ತಿರುಗೇಟು ನೀಡಿದ್ದಾರೆ.

ಅಮೇಠಿ ಜನರಿಗೆ ಹಾಕಿಕೊಳ್ಳೋದಕ್ಕೆ ಶೂಗಳಿಲ್ಲ :

ಅಮೇಠಿಯಲ್ಲಿ ರಾಹುಲ್ ವಿರುದ್ಧ 2ನೇ ಬಾರಿ ಸ್ಪರ್ಧಿಸಿರುವ ಕೇಂದ್ರ ಸಚಿವೆ ಸ್ಮೃತಿ ಇರಾನಿ, ಅಮೇಠಿಯಲ್ಲಿ ಜನರಿಗೆ ಈವರೆಗೂ ಹಾಕಿಕೊಳ್ಳೋದಕ್ಕೆ ಶೂಗಳಿಲ್ಲ. ಅಂಥವರ ಮುಂದೆಯೇ ರಾಹುಲ್ ಗಾಂಧಿ ಭಾಷಣ ಮಾಡ್ತಾರೆ ಅಂತಾ ವಾಗ್ದಾಳಿ ನಡೆಸಿದ್ದರು. ಇದಕ್ಕೆ ಈಗ ರಾಹುಲ್ ಸೋದರಿ ಪ್ರಿಯಾಂಕಾ ಗಾಂಧಿ ಟಾಂಗ್ ನೀಡಿದ್ದಾರೆ.