ಜೈಲಿನಿಂದ 98 ವರ್ಷದ ವೃದ್ಧ ಬಿಡುಗಡೆ: ಬೆಂಗಾವಲಿನೊಂದಿಗೆ ಕಳುಹಿಸಿಕೊಟ್ಟ ಪೊಲೀಸರು!

ಐದು ವರ್ಷಗಳ ಕಾಲ ಉತ್ತರ ಪ್ರದೇಶದ ಅಯೋಧ್ಯೆ ಜೈಲಿನಲ್ಲಿದ್ದ 98 ವರ್ಷದ ವೃದ್ಧನನ್ನು ಬಿಡುಗಡೆ ಮಾಡಲಾಗಿದೆ.

ಅಯೋಧ್ಯೆ(ಉತ್ತರ ಪ್ರದೇಶ): ಜೈಲು ಸೇರಿದ್ದ 98 ವರ್ಷದ ವೃದ್ಧ ರಾಮ್​ ಸೂರತ್​ ಅವರನ್ನು ಉತ್ತರ ಪ್ರದೇಶದ ಅಯೋಧ್ಯೆ ಜೈಲಿನಿಂದ ಭಾನುವಾರ ಬಿಡುಗಡೆ ಮಾಡಲಾಯಿತು. ಜೈಲು ಸಿಬ್ಬಂದಿ ಅವರನ್ನು ಬೀಳ್ಕೊಟ್ಟಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ. ವಿಡಿಯೋದಲ್ಲಿ ಜೈಲು ಅಧೀಕ್ಷಕ ಶಶಿಕಾಂತ್ ಮಿಶ್ರಾ ಅವರು ಸೂರತ್​ ಅವರಿಗೆ ಎಸ್ಕಾರ್ಟ್​ ನೀಡಿ (ಬೆಂಗಾವಲು) ಮನೆಗೆ ತಲುಪಿಸಿದ್ದಾರೆ. ಈ ವಿಡಿಯೋವನ್ನು ಉತ್ತರ ಪ್ರದೇಶ ಕಾರಾಗೃಹ ಇಲಾಖೆ ಡಿಜಿ ಟ್ವಿಟರ್​ನಲ್ಲಿ ಹಂಚಿಕೊಂಡಿದ್ದು, ಬಿಡುಗಡೆ ವೇಳೆ ರಾಮ್ ಸೂರತ್‌ ಅವರ ಯಾವುದೇ ಸಂಬಂಧಿಗಳು ಹಾಜರಿರಲಿಲ್ಲ ಎಂದು ಬರೆದುಕೊಂಡಿದ್ದಾರೆ. ​

‘ರಾಮ್ ಸೂರತ್ ಅವರು ಐಪಿಸಿ ಸೆಕ್ಷನ್ 452, 323, 352 ಅಡಿ ಐದು ವರ್ಷ ಜೈಲು ಶಿಕ್ಷೆಗೊಳಗಾಗಿದ್ದರು. 2022 ರ ಆಗಸ್ಟ್​ 8 ರಂದು ಇವರನ್ನು ಬಿಡುಗಡೆ ಮಾಡಲು ನಿರ್ಧರಿಸಲಾಗಿತ್ತು. ಆದರೆ ಮೇ 20 ರಂದು ಅವರಿಗೆ ಕೋವಿಡ್​-19 ದೃಢಪಟ್ಟಿತ್ತು. ಹಾಗಾಗಿ ಸೂರತ್​ ಅವರನ್ನು 90 ದಿನಗಳವರೆಗೆ ಪೆರೋಲ್​ಗೆ ಕಳುಹಿಸಲಾಗಿತ್ತು’ ಎಂದು ಶಶಿಕಾಂತ್ ಮಿಶ್ರಾ ತಿಳಿಸಿದರು.

ಇದನ್ನೂ ಓದಿ:ಬೀದರ್ ಉತ್ಸವದಲ್ಲಿ ಕುಮಾರ್ ಸಾನು ಗಾನಸುಧೆ- ವಿಡಿಯೋ