राज्य मा उत्पादित आम और शहदै पैली खेप रवाना: शुक्रवारौ मुख्यमंत्री पुष्कर सिंह धामी न राज्य मा उत्पादित आम और शहदै पैली खेप थै एपीडा का माध्यम से अंतरराष्ट्रीय बाजार दुबई मा निर्यात थै हरी झंडी दिखै की रवाना करी. वित्तीय वर्ष 2021-22 मा उत्तराखंड बटी 15673 मीट्रिक टन कृषि व बागवानी उत्पादूं कु निर्यात विभिन्न देशूं थै किये जालू. यां की कीमत 95.40 करोड़ च.
UKSSSC चेयरमैन एस राजू कु इस्तीफा: UKSSSC पेपर लीक मामला मा आज बड़ू घटनाक्रम ह्वे. ये मामला मा आज UKSSSC का चेयरमैन और पूर्व आईएएस अधिकारी एस राजू न इस्तीफा दियेली. एस राजू न UKSSSC पेपर लीक मामला मा नैतिक जिम्मेदारी लेकी इस्तीफा दिनी. बथै UKSSSC पेपर लीक मामला अबी एसटीएफ जांच कन्नी च. ये मामला मा अब तक 13 लोगू की गिरफ्तारी ह्वे गी.
कांग्रेस कु विरोध प्रदर्शन: बढ़दी महंगाई और बेरोजगारी का विरोध मा आज कांग्रेस कार्यकर्ताऊं न शुक्रवारौ राजधानी देहरादून मा विरोध प्रदर्शन करी. कांग्रेस कार्यकर्ताऊं न सड़कूं पर उतरी केंद्र सरकार का खिलाफ जमकर नारेबाजी करी. ये दौरान कांग्रेस प्रदेश अध्यक्ष करन माहरा न बोली केंद्र सरकार जनता पर बोझ बढ़ौणी च. अग्निपथ योजना, बढ़ती महंगाई और बेरोजगारी का विरोध मा प्रदर्शकारी कांग्रेस्यूं न राजभवन भी कूच करी.
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
आंगनबाड़ी कार्यक्रत्री पुरस्कार शुरू करली धामी सरकार:धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
रक्षाबंधन पर सरकार और डाक विभाग कु तोहफा: रक्षाबंधन पर उत्तराखंड सरकार और डाक विभाग न बड़ू तोहफा दिनी. रक्षाबंधन का दिन महिला उत्तराखंडै रोडवेजै बसूं मा फ्री सफर कर सकदन. या सुविधा सिर्फ उत्तराखंडै सीमा मा ही लागू राली. वखी, डाक विभाग न भी राखी भेजणौ देहरादून मा स्पेशल काउंडर खोल्यां छन. यां का अलावा राखी भेजणौ डाक विभाग न एक स्पेशल लिफाफा भी बणै, जु की वाटर प्रूफ च.
श्रीनगर NIT का नया शैक्षणिक सत्र की शुरूआत: राष्ट्रीय प्रौद्योगिकी संस्थान (एनआईटी) श्रीननगर मा अज बटी नयू शैक्षणिक सत्र शुरू ह्वे गी. ये सत्र मा सभी क्लास ऑफलाइन संचालित होंणी छन. एनआईटी श्रीनगर मा 500 छात्रों की रौणै व्यवस्था च. दगड़ा मा ही यख खानपानौ मैस और कैंटीन कु संचालन भी शुरू ह्वे गी. छात्रूं कु वार्षिक कैलेंडर भी आज जारी करे गी.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
उत्तराखंड मा फिर बढ़ी कोरोना :उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 331 नया मामला समणि ऐनी, ज्या का बाद प्रदेश मा कोरोना संक्रमितू की संख्या 99,423 ह्वे गी, जबकि यां से मन्न वालौ की संख्या 299 च.
