CBSE बोर्ड न घोषित करीन परीक्षा परिणाम: CBSE बोर्ड न आज सुबेर 12वीं और 10वीं का परीक्षा परिणाम घोषित ह्ले गीन. 12वीं कक्षा मा एक बार फिर लड़कियूं न बाजी मारी. CBSE बोर्ड मा देहरादून रीजन कु परीक्षा परिणाम 85.39 प्रतिशत रै. ओवरआल प्रदर्शन का आधार पर 16 रीजनूं मा देहरादून 15वा स्थान पर रै. देहरादून रीजन मा तीन छात्रूं न संयुक्त रूप से पैलू स्थान हासिल करी. यां मा ऋषिकेश का अभिनव उनियाल, रुद्रपुरै हरमन और अमरोहा (यूपी) की कशिश यादव न 498 अंक हासिल करीन.
पलायन आयोग कु बदले गी नौ: मुख्यमंत्री पुष्कर सिंह धामी की अध्यक्षता मा आज ग्राम्य विकास एवं पलायन आयोगै बैठक आयोजित करे गी. बैठक मा सीएम धामी न बोली ग्रामीण क्षेत्रूं से पलायन रोकणौ उद्देश्य से बण्या ये आयोग कु नौ 'पलायन निवारण आयोग' रखे जालू. यां का आलावा ऊंन अपर मुख्य सचिव आनंद वर्द्धनै अध्यक्षता मा एक कमेटी बणौणा निर्देश भी दिनीन. दगड़ा मा ही सीएम धामी न बोली पलायन का क्षेत्र मा कार्ययोजना बणै की धरातल पर काम करे जौ.
आंगनबाड़ी कार्यक्रत्री पुरस्कार शुरू करली धामी सरकार:धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
यूरोपीय देशूं का दौरा पर जाला 6 विधायक: उत्तराखंड का कृषि मंत्री गणेश जोशी दगड़ि सत्ता और विपक्ष का 6 विधायक और अधिकारियूं कु दल यूरोपीय देशूं का दौरा पर जाला. सत्ताधारी दल का चार विधायकूं मा राम सिंह कैड़ा, सुरेश गड़िया, प्रदीप बत्रा और रेनू बिष्ट शामिल छन. यां का अलावा द्वी कांग्रेस का विधायकूं मा मनोज तिवारी व हरीश धामी शामिल छन. यू सबी यूरोपीय देशूं मा कृषि मा इस्तेमाल होंण वाली टेक्नोलॉजी की गहन जानकारी ल्याला. गणेश जोशी न बोली न या से प्रदेशै इकोनॉमी थै मजबूती मिलली.
हरिद्वार मा कांवड़ियूं पर हेलीकॉप्टर से बरसाये गीन फूल: कांवड़ यात्रा 14 जुलाई से शुरू ह्वे गी. कांवड़ियों थै कै भी तरह की क्वी परेशानी न हो, यां कु थै लेकी विशेष इंतजामात कर्यां छन. ई कड़ी मा आज नारसन बॉर्डर से लेकी हर की पैड़ी हरिद्वार तक जगह-जगहों पर हेलीकॉप्टर से कांवड़ियूं का मथी पुष्प वर्षा करे गी. विशेष रूप से हर की पैड़ी पर कई जगहों पर आसमान से फूल डले गीन. ये स्वागत से कावड़िया भी गदगद नजर ऐन.
नर्सूं की लंबित भर्तियूं थै लेकी विरोध प्रदर्शन: प्रदेश मा नर्स का कई पदूं पर वर्षों से भर्ती लंबित छन. जौं थै करौणै मांग लगातार होंणी च. आज ई मांग थै लेकी एलिंग वेलफेयर नर्सेज फाउंडेशन का दगड़ी भारतीय किसान यूनियन भानू न एक साथ मोर्चा खोलेली. यू द्वी संगठनू यमुना कॉलोनी गेट पर नारेबाजी करी धरना प्रदर्शन करी. यां का बाद यू संगठन का एक प्रतिनिधिमंडल न स्वास्थ्य मंत्री धनसिंह रावत दगड़ि मुलाकात भी करी. ज्या मा स्वास्थ्य मंत्री न उंथै जल्द भर्ती करौणा आश्वासन दिनी.
किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
उत्तराखंड मा थमी कोरोना की रफ्तार: उत्तराखंड मां धीरे-धीरे कोरोना का मामला कम होंणा छन. आज प्रदेश मा कोरोना का 201 नया मामला समणि ऐनी, ज्या का बाद प्रदेश मा कोरोना संक्रमितू की संख्या 95,548 ह्वे गी, जबकि यां से मन्न वालौ की संख्या 286 च. प्रदेश मा कोरोना संक्रमित मरीजुं की रिकवरी रेट 96.10% च.
