पीएम मोदी की मन की बात
दिल्ली मा किसान आंदोलन का बीच आज पीएम मोदी न मन की बात का 72 वां स्स्कऱण मा देशवास्यूं थै संबोधित करी. पीएम मोदी कु यू संबोधन 2020 कु अंतिम संबोधन छौ. मन की बात कार्यक्रम मा आज पीएम मोदी न देश मा बाघु और तेंदुओ की सखंया बढ़ण पर खुशी जतै.
पीएम मोदी किसान रेल थै दिखाला हरी झंडी
28 दिसंबरौ पीएम मोदी 100 वीं किसान रेल थै हरी झंड़ी दिखाला. या रेल महाराष्ट्र का सांगोला बटी प. बंगाल का शालीमार तक चलली. पीएम मोदी का ये कार्यक्रमै जानकारी पीएमओं न दिनी.
सरकार से बातचीतौ तैयार किसान संगठन
दिल्ली मां किसानुं कु आंदोलन 32 वीं दिन भी जारी च. किसान तीन कृषि कानूनू थै रद्द कन्नै मांग थै लेकी आंदोलरत छन. यां का बीच किसान संगठन सरकार से बाचचीतौ थै तैयार ह्वे गिन. वखी गाजीपुर बॉर्डर मा कृषि कानूनू का खिलाफ प्रधर्शनकारी किसानूं अरदास करी.
रेल यात्र्यूं थै बड़ी खुशखबरी
रेल यात्र्यूं थै बड़ी खुशखबरी च. भारतीय रेलवे न यात्र्यूं की सुविधा थै ध्यान मा रखी कई ट्रेनुं कु विस्तार कन्नौ फैसला करी. भारतीय रेलवे का मुताबिक यूं ट्रेनुं कु परिचालन समय बढैं की 31 दिसंबर से 31 जनवरी करे गी.
उत्तराखंड मां कोरोना कु कहर
उत्तराखंड मां कोरोना कु कहर लगातर बढ़दू ही जांणु च. ब्याली प्रदेश मां कोरोना का 374 नया मामला समणि एनी. जैका का बाद प्रदेश मा कोरोना संक्रमितुं की संख्या 89,218 पौंछि गी. जबकि यां से मन्न वालौं की संख्या 1476 ह्वे गी. कोरोना का बढदा मामलों से सरकार और स्वास्थ्य विभाग चिंतित च.
इंदिरा हृदयेश न त्रिवेंद्र सरकार पर साधी निशाणु
नेता प्रतिपक्ष इंदिरा हृदयेश न त्रिवेंद्र सरकार पर निशाणु साधी. उन बोली कि राज्य सरकार अपणा ही विधायकुं की नी सुणणी च, जैका कारण विधायक परेशान छन. यां का अलावा इंदिरा हृदयेश न बोली 2022 विधानसभा चुनाव मां प्रदेश मां कांग्रेस की ही सरकार बणली, उन बोली बीजेपी का कई नाराज विधायक उंका संपर्क मा छन.
फरार आरोपी गिरफ्तार
ऋषिकुल मा मासूम दगड़ि रेप का हत्या मामला मा पुलिस का हाथ बड़ी सफलता लगी. पुलिस न मामला मा फरार एक आरोपी थै उत्तरप्रदेश का सुल्तानपुर बटी गिरफ्तार करी. पुलिससन आरोपी का भै की निशानदेही और सुरागुं का आधार पर आरोपी की गिरफ्तारी करी. बथै द्या कि 20 दिसंबरौ ऋषिकुल इलाका मा एक 11 साल का नाबालिग बच्ची दगड़ि दुष्कर्म कन्ना बाद व्हीकी हत्या करे गी छै.
आयुर्वेदिक अस्पतालुं मा अब योग कक्षा संचालित
उत्तराखंड का सरकारी आयुर्वेदिक अस्पतालुं मां अब आयुर्वेदिक दगड़ि योग कक्षा भी संचालित किये जाली. केंद्र सरकार की आयुष्मान भारत योजना का तहत कुमाऊं मंडल क 23 आयुर्वेदिक अस्पतालुं थै याकुं चिन्हित करे गी. यू आयुर्वेदिक अस्पतालुं मां उधम सिंह नगर का 6 अस्पताल, अल्मोड़ा का 6, नैनीताल का 4, चंपावत का 4, पिथौरागढ़ का 2 और बागेश्वरौ एक अस्पताल च.
कॉर्बेट पार्क मा जल्द शुरू होली हाथी सफारी
अब जल्द ही कॉर्बेट पार्क मा पर्यटक हाथी सफारी कु आनंद ले सकला. वन मंत्री हरक सिंह रावत न ये मामला मा बोली कि कॉर्बेट मा हाथी सफारी थै लेकी विधिक राय लिये जांणी च. दगड़ा मां यां कु अध्यन किये जांणु च. बथै द्या कि साल 2017 मा ढिकाला मा हाथियूं पर एक जंगली तस्कर न हमला करेली छौ. जैका बाद कॉर्बेट प्रशासन न कुछ टैमो ढिकाला जोन मा हाथी सफारी बंद करेली छै.
इनामी बदमाशौ सहयोगी गिऱफ्तार
ब्याली बिजनौर का चांदपुर मा उत्तराखंड एसटीएफ और बिजनौर पुलिस न संयुक्त ऑपरेशन में 20 हजार का इनामी बदमाश कुलदीप सिंह उर्फ केडी कु पीछा करी. ये दौरान पुलिस टीम और बदमाशुं का बीच फायरिंग ह्वे. मगर अंधेरा कु फैदा उठै कि बदमाश भगड़मा कामयाब रैनी. यां मा एसटीएफ ने केडी का साथी परमजीत थै गिरफ्तार करी.
