ওদালগুৰি, 29 নৱেম্বৰ: এয়া বনভোজৰ বতৰ(Season for picnics) ৷ পুৰণি বৰ্ষটোৱে বিদায় ল’বলৈ মাজত মাথো এটা মাহ বাকী । প্ৰতি বছৰেই নৱেম্বৰ মাহৰ পৰা নৱবৰ্ষ পৰ্যন্ত ৰাজ্যৰ সুন্দৰ সুন্দৰ স্থানসমূহলৈ বনভোজপ্ৰেমীৰ স্ৰোত বৃদ্ধি হোৱা পৰিলক্ষিত হয় ৷ বাচকবনীয়া স্থানলৈ প্ৰতিগৰাকী লোকেই আত্মীয়-স্বজন, বন্ধু-বান্ধৱৰ সৈতে বনভোজ খাবলৈ যোৱা দেখিবলৈ পোৱা যায় ৷
ইতিমধ্যে ৰাজ্যৰ বিভিন্ন বনভোজস্থলীলৈ বনভোজপ্ৰেমীৰ সোঁত বোৱা পৰিলক্ষিত হৈছে । প্ৰকৃতিৰ সৌন্দৰ্য উপভোগ কৰি পৰিয়াল, বন্ধুবৰ্গৰ সৈতে এসাঁজ খোৱাৰ উদ্দেশ্যৰে বনভোজপ্ৰেমীৰ দলবোৰ ৰাওনা হৈছে নিৰ্দিষ্ট বনভোজস্থলীৰ দিশে ৷ কিন্তু পৰিয়ালৰ সৈতে শান্তিৰে এসাঁজ খাবলৈ বনভোজথলীত ভিৰ কৰাৰ সময়তে ৰাজ্যৰ অন্যতম এটি বনভোজস্থলীত ঘটিল অথন্তৰ ৷
ওদালগুৰিৰ ভৈৰৱকুণ্ড বনভোজস্থলীত বনভোজৰ উছাহ-আনন্দৰ মাজতে পাহাৰৰ পৰা নামি অহা এটি বন্যহস্তীয়ে ক্ষন্তেকৰ বাবে ম্লান পেলালে বনভোজৰ আনন্দ(Wild elephants in the picnic area) ৷ বনভোজপ্ৰেমী সকলে পৰিয়াল, বন্ধু-বান্ধৱৰ সৈতে ৰং-ৰহইচত মচগুল হৈ থকাৰ সময়তে পাহাৰৰ পৰা হঠাতে নামি অহা এটি বন্যহস্তীয়ে আতংকিত কৰি তোলা পৰিলক্ষিত হয় বনভোজস্থলীত উপস্থিত আটাইকে (Bhairabkunda picnic spot In Odalguri) ।