চপৰা চপৰকৈ খহিল তিনিচুকীয়াৰ নৱ-নিৰ্মিত পথ

তিনিচুকীয়া জিলাৰ ফিল'বাৰীত পথ নিৰ্মাণৰ নামত ব্যাপক দুৰ্নীতিৰ অভিযোগ ৷ নিম্ন মানদণ্ডৰে কাম কৰি এক বৃহৎ পৰিমাণৰ ধন আত্মসাৎ কৰাৰ অভিযোগ উত্থাপন স্থানীয় ৰাইজ তথা দল-সংগঠনৰ ৷

তিনিচুকীয়া, 26 অক্টোবৰঃ তিনিচুকীয়া জিলাৰ ফিল'বাৰীত পথ নিৰ্মাণৰ নামত ব্যাপক দুৰ্নীতিৰ অভিযোগ ৷ দুৱাৰমৰা খেৰজান পথৰ নৱ-নিৰ্মিত পাৰ্বতিপুৰৰ পৰা টঙানী সোণজান অংশত ঠিকাদাৰ আৰু বিভাগীয় কৰ্তৃপক্ষই গোপন বুজাবুজিৰে নিম্ন মানদণ্ডৰে কাম কৰি এক বৃহৎ পৰিমাণৰ ধন আত্মসাৎ কৰাৰ অভিযোগ উত্থাপন স্থানীয় ৰাইজ তথা দল-সংগঠনৰ ৷ পথটোৰ লগতে পথচোৱাত থকা কেইবাটাও কালভাৰ্ট চপৰা চপৰকৈ খহাৰ লগতে চিৰাল ফাঁট দিয়া দেখা গৈছে ৷ তিনিচুকীয়াৰ বহু বিতৰ্কিত পথ নিৰ্মাণকাৰী ঠিকাদাৰী সংস্থা বি.বি. এন্টাৰপ্ৰাইজ আৰু বিভাগীয় তদাৰকী অভিযন্তাই গড়কাপ্তানী বিভাগৰ নীতি নিৰ্দেশনাক অৱমাননা কৰি দুৰ্নীতিৰ বজাৰ মেলি নিম্ন মানদণ্ডৰ নির্মাণকাৰ্য কৰাত ক্ষোভিত হৈ পৰিছে স্থানীয় ৰাইজ তথা দল-সংগঠন ৷ এই পথটো নিৰ্মাণৰ প্ৰথম অৱস্থাৰ পৰাই ব্যাপক খেলিমেলি হোৱাৰ বাতৰি পূৰ্বেই সংবাদ মাধ্যমত প্ৰচাৰিত হৈছিল। এই বিষয়ে বিভাগীয় কৰ্তৃপক্ষক অতি শীঘ্ৰেই বিহিত ব্যৱস্থা গ্ৰহণ কৰিবলৈ অসম জাতীয়তাবাদী যুৱ-ছাত্ৰ পৰিষদ ফিল'বাৰী আঞ্চলিক সমিতিয়ে দাবী জনাইছে অন্যথা তেওঁলোকে গণতান্ত্ৰিক আন্দোলনৰ হুংকাৰ দিয়ে ৷

আৰু পঢ়কঃ শৌচালয়ৰ অভাৱত লঘোণে থকা গাঁওখনৰ মহিলাসকল