মহাজোঁটৰে একত্ৰিত হবলৈ ৰাইজৰ দল-এজেপিক আহ্বান চি পি আই(এম)ৰ

অন্যান্য ৰাজনৈতিক দল সমূহৰ লগতে অসমত 2021ৰ বিধানসভা নিৰ্বাচনৰ দিন চমু চাপি অহাৰ লগে লগে তৎপৰ হৈ পৰিছে কংগেছ-এআইইউডিএফকে ধৰি ছয়টা দলেৰে গঠিত মিত্ৰজোঁটত থকা চি পি আই (এম) ৷ দলটোৰ জ্যেষ্ঠ নেতা দেৱেন ভট্টাচাৰ্য্যই দেওবাৰে ৰাইজৰ দল-অসম জাতীয় পৰিষদকো মহাজোঁটত অংশগ্ৰহণ কৰিবলৈ আহ্বান জনায় ৷

ৰঙাপৰা, 24 জানুৱাৰী : ছয়টা বিৰোধী ৰাজনৈতিক দলৰে গঠিত মহাজোঁটৰ সৈতে একত্ৰিত হবলৈ ৰাইজৰ দল-অসম জাতীয় পৰিষদক আহ্বান চি পি আই (এম)ৰ ৷ শোণিতপুৰ জিলাৰ ৰঙাপৰাত কেইবাটাও দাবীত অনুষ্ঠিত হোৱা 'শোণিতপুৰ জিলা সমাৱেশ'ত বক্তা হিচাপে উপস্থিত থাকি চি পি আই (এম)ৰ অসম ৰাজ্যিক কমিটিৰ সম্পাদক দেৱেন ভট্টাচাৰ্য্যই এই আহ্বান জনায় আঞ্চলিক দল দুটাক ।

আগন্তুক বিধানসভা নিৰ্বাচনত ছয়টা বিৰোধী ৰাজনৈতিক দলৰ সৈতে হোৱা মিত্ৰতাৰ সন্দৰ্ভত সোধা প্ৰশ্নত্তোৰত তেওঁ কয় যে, বিজেপি দলটোক পৰাস্ত কৰাৰ প্ৰদান লক্ষ্য আৰু উদ্দেশ্যৰে ছয়টা বিৰোধী দল ক্ৰমে কংগ্ৰেছ, এ আই ইউ ডি এফ, চি পি আই (এম), চি পি আই এল এম, অসম গণ মৰ্চা আৰু আঞ্চলিক গণ মৰ্চাই একত্ৰিত হৈছে । আগন্তুক বিধানসভা নিৰ্বাচনত ছয়টা বিৰোধী ৰাজনৈতিক দলে ঐক্যবদ্ধ নিৰ্বাচনত যুঁজ দিয়াৰ সিদ্ধান্ত গ্ৰহণ কৰিছে । কাৰণ বিজেপিয়ে ধৰ্মৰ নামত ৰাজনীতি কৰি অসমখনত শান্তি-সম্প্ৰতি বিনষ্ট কৰিবলৈ ওলাইছে । এনে পৰিস্থিতিত বিজেপি দলটোক উৎখাত কৰিবলৈ ছয়টা বিৰোধী ৰাজনৈতিক দল ঐক্যবদ্ধ হৈছে ।

আনহাতে ৰাইজৰ দল আৰু এজেপিক আহ্বান জনাই জ্যেষ্ঠ চিপিআই (এম)ৰ নেতাগৰাকীয়ে কয় যে, " আমাৰ সৈতে ৰাইজৰ দল আৰু অসম জাতীয় পৰিষদক একত্ৰিত হবলৈ আহ্বান জনাইছো । 'কা' বিৰোধিতাৰ ক্ষেত্ৰতো চি পি আই (এম) দলৰ লেখীয়াকৈ তেওঁলোকে বিৰোধীতা কৰিছে । জাতিধ্বংসী আইনখন বলবৎ কৰা বিজেপি দলটোক পৰাস্ত কৰাটো দুয়োটা ৰাজনৈতিক দলৰ মূল উদ্দেশ্য হয় তেতিয়া হ’লে সৰ্বভাৰতীয় ৰাজনৈতিক দলৰ সৈতে আঞ্চলিক দল দুয়োটা সহযোগিতা কৰাটো আপত্তি ক'ত । "

লগতে পঢ়ক: মমতা বেনাৰ্জীক ৰামায়ণ উপহাৰ দিলে কোন বিজেপি নেতাই ?