তেজপুৰ,৬ অক্টোবৰ:বুধবাৰে উত্তৰ ছিকিমৰ লোনাক হ্ৰদৰ ওপৰত হঠাতে হোৱা ডাৱৰ বিস্ফোৰণৰ ফলত লাচেন উপত্যকাৰ তিস্তা নদীত সৃষ্টি হৈছিল আকস্মিক বান । উপত্যকাটোৰ সমীপৰ কিছু সেনা শিবিৰো প্ৰভাৱিত হৈছিল এই বানত । যাৰ পৰিপ্ৰেক্ষিতত প্ৰথমাৱস্থাতে মুঠ ২৩ জন সেনা জোৱান সন্ধানহীন হোৱাৰ খবৰ পোৱা গৈছিল । বহু কেইজনক উদ্ধাৰ কৰা হয় যদিও বৰ্তমানো সন্ধানহীন বহু সেনা বিষয়া ।
সন্ধানহীন ভাৰতীয় সেনাৰ সম্ভেদ বিচাৰি উদ্ধাৰকাৰী দলে অনুসন্ধান অব্যাহত ৰাখিছে বুলি জানিবলৈ দিয়ে প্ৰতিৰক্ষা মুখপাত্ৰ লেফটেনেণ্ট কৰ্ণেল মহেন্দ্ৰ ৰাৱটে । লেফটেনেণ্টগৰাকীয়ে লগতে জনাই যে ভাৰতীয় সেনাই খাদ্য, চিকিৎসা সাহায্য আৰু উত্তৰ ছিকিমত আৱদ্ধ হৈ থকা অসামৰিক লোক আৰু পৰ্যটকসকলক যোগাযোগৰ সুবিধা প্ৰদানৰ ক্ষেত্ৰত অবিৰতভাৱে সহায় আগবঢ়াই গৈছে ।
তেওঁ জনোৱা অনুসৰি সন্ধানহীন ভাৰতীয় সেনাসকলৰ সন্ধানত তিস্তা বেৰেজৰ নামনিত অনুসন্ধান অব্যাহত ৰাখিছে । চিংটামৰ সমীপত খনন চলাই সেনাৰ বাহন আৰু দোকানসমূহ উদ্ধাৰ কৰা হৈছে । অনুসন্ধান অভিযান তীব্ৰতৰ কৰিবলৈ TMR (Tiranga Mountain Rescue), ট্ৰেকাৰ কুকুৰ, বিশেষ ৰাডাৰ তথা বিশেষ অনুসন্ধানকাৰী দলৰ সহায় লোৱা হৈছে বুলিও মহেন্দ্ৰ ৰাৱটে জানিবলৈ দিয়ে ।