নিষ্ঠুৰঃ উপহাৰ আৰু স্বামীৰ নিথৰ দেহ আহিল একেলগে

নগাঁৱত পত্নীৰ বাবে উপহাৰ লৈ ঘৰলৈ গৈ থাকোতেই দুর্ঘটনাত নিহত হ'ল স্বামী ৷ প্ৰথম বিবাহ বাৰ্ষিকীত পত্নীয়ে উপহাৰ হিচাপে পালে বিধৱা সাজ ৷

নগাঁও , 06 জুন :নগাঁৱৰ চামগুৰিত বুধবাৰে এক হৃদয় বিদাৰক ঘটনা সংঘটিত হয় ৷ বিবাহ বাৰ্ষিকীত পত্নীক সকলোৱে দিব বিচাৰে উপহাৰ ৷ কিন্তু নগাঁৱত প্ৰথম বিবাহ বাৰ্ষিকীত পত্নীয়ে উপহাৰ হিচাপে পালে বিধৱাসাজ ৷

চামগুৰিৰ আমলখিৰ প্ৰাঞ্জল প্ৰধান নামৰ যুৱক এজনে প্ৰথম বিবাহ বাৰ্ষিকীত পত্নীৰ বাবে উপহাৰ লৈ নিজ হাতেৰে দিব নোৱাৰিলে পত্নীক ৷ বুধবাৰে নিশা ,প্ৰাঞ্জলে উপহাৰ কিনি নিজৰ বন্ধুক লগত লৈ ঘৰ অভিমুখে গৈ থকা অৱস্থাত এক দুর্ঘটনা পতিত হৈ কৰুণভাৱে মৃত্যুক সাৱতি লয় ৷ নিশা চামগুৰিৰ ৰঙাগৰাত ৰৈ থকা এখন ট্ৰাকত খুন্দিওৱাৰ ফলত সংঘটিত হয় এই দুর্ঘটনাটো ৷ ইপিনে প্ৰাঞ্জলৰ লগত থকা বিনয় বেহেৰা নামৰ যুৱকজন দুর্ঘটনাটোত গুৰুতৰভাৱে আঘাতপ্ৰাপ্ত হয় ৷ গুৰুতৰভাৱে আহত বিনয়ক সংকটজনক অৱস্থাত গুৱাহাটীলৈ প্ৰেৰণ কৰা হয় ৷ মৃত প্ৰাঞ্জলৰ ঘৰত এতিয়া বিবাহবাৰ্ষিকীৰ আনন্দ উচাহৰ বিপৰীতে কেৱল কান্দোনৰ ৰোল ৷