Lakhimpur firing case: অৰুণাচলী দুৰ্বৃত্তক ফাঁচীৰ দাবীৰে লখিমপুৰত বিভিন্ন দল-সংগঠনৰ প্ৰতিবাদ

লখিমপুৰ অসম-অৰুণাচল সীমান্তত দুগৰাকীকৈ অসমীয়া লোকক অৰুণাচলীয়ে গুলীয়াই হত্যা কৰাক কেন্দ্ৰ কৰি অব্যাহত আছে প্ৰতিক্ৰিয়া আৰু প্ৰতিবাদ ৷ দোষীক গ্ৰেপ্তাৰ কৰাৰ লগতে নিহত দুই ব্যক্তিক ক্ষতিপূৰণ দিয়াৰ দাবীৰে বুধবাৰেও সাব্যস্ত কৰে প্ৰতিবাদ (Lakhimpur border firing case) ৷

লখিমপুৰ, ৭ জুন: জয়ৰামপুৰৰ পানবাৰীত সংঘটিত হোৱা ঘটনাৰ প্ৰতিবাদত কঁপিছে লখিমপুৰ জিলা ৷ অৰুণাচলীৰ গুলীচালনাত দুজনকৈ অসমীয়া লোকে প্ৰাণ হেৰুৱাবলগীয়া হোৱা ঘটনাৰ প্ৰতিবাদত বিভিন্ন সংগঠনে তীব্ৰ প্ৰতিবাদ সাব্যস্ত কৰিছে ৷ বুধবাৰে জিলাখনৰ হাৰমতীৰ সমীপৰ অৰুণাচল সীমান্তৰ গুমটোত কেইবাটাও সংগঠনে অৰুণাচল সংযোগী পথ অৱৰোধ কৰি উত্তপ্ত পৰিস্থিতি সৃষ্টি কৰে (Assam Arunachal border clash) ৷

বিভিন্ন সংগঠনে এই ঘটনাৰ প্ৰতিবাদত পুত্তলিকা দাহ, পথ অৱৰোধ আদি বিভিন্ন কাৰ্যসূচীৰে প্ৰৱল প্ৰতিবাদ অব্যাহত ৰাখিছে ৷ সোমবাৰে পুৱাৰ ভাগত এই ঘটনা সংঘটিত হোৱাৰ পিচতে জাতীয়তাবাদী যুৱ ছাত্ৰ পৰিষদে সীমান্তবাসী অসমীয়াক সুৰক্ষা দিব নোৱাৰা, সীমা সমস্যা সমাধান কৰিব নোৱাৰা বুলি চৰকাৰক ধিক্কাৰ দি মুখ্যমন্ত্ৰীৰ পুত্তলিকা দাহ কৰে ৷ মঙলবাৰেও প্ৰতিবাদত কঁপে জিলাখন (Firing at Arunachal border) ৷

বহুকেইটা সংগঠনে একেলগে লখিমপুৰ নগৰৰ সমীপৰ পহুমৰাৰ ১৫ নং ৰাষ্ট্ৰীয় ঘাইপথৰ পৰা কিমিনহৈ অৰুণাচলক সংযোগ কৰা পথটো তিনি ঘন্টা ধৰি অৱৰোধ কৰে ৷ সন্ধিয়াও অব্যাহত থাকে প্ৰতিবাদ ৷ অসমীয়া যুৱ মঞ্চই নগৰৰ মাজত ধৰ্ণা দিয়াৰ লগতে সংগঠনটোৰ দুজনকৈ নেতাই মুণ্ডন কৰি এই ঘটনাৰ প্ৰতিবাদ জনায় (Assam Arunachal border dispute) ৷

বুধবাৰে পুৱাৰ পৰা পুনৰ প্ৰতিবাদত উত্তাল হয় অৰুণাচল সীমান্ত ৷ অৰুণাচলীৰ গুলীত নিহত হোৱা দুজনকৈ অসমীয়া লোকৰ মৃত্যুৰ তদন্ত তথা হত্যাকাৰী অৰুণাচলীক ধেমাজি আৰক্ষীক গতাই দিয়াৰ লগতে নিহত দুজনৰ পৰিয়ালক ৫০ লাখকৈ টকা আৰু আহত সকলক ৫ লাখকৈ টকা তৎকালীনভাৱে অৰুণাচল চৰকাৰক দিবলৈ দাবী জনাই সাব্যস্ত কৰা হয় এই প্ৰতিবাদ ৷

বিভিন্ন প্ৰতিবাদী শ্লোগানেৰে জয়ৰামপুৰৰ ঘটনাত জড়িত দুৰ্বৃত্তক ফাঁচী দিয়াৰ দাবী উত্থাপন কৰে প্ৰতিবাদী দল-সংগঠনসমূহে ৷ গোৰ্খা ছাত্ৰ সন্থাৰ লখিমপুৰ জিলা সমিতি, কৈৱৰ্ত যুৱ ছাত্ৰ সন্মিলনৰ লখিমপুৰ জিলা সমিতি, আদিবাসী ছাত্ৰ সন্থাৰ লখিমপুৰ জিলা সমিতি আদিকে ধৰি কেইবাটাও সংগঠনকে সাব্যস্ত কৰে এই প্ৰতিবাদ ৷

লগতে পঢ়ক:Firing in Assam Arunachal border: লখিমপুৰত অসম-অৰুণাচল সংযোগী পথ অৱৰোধ