ইউ পি পি এলৰ প্ৰাৰ্থীক সমৰ্থন কৰি বিপদত আজমল

শুকুৰবাৰে কোকৰাঝাৰত অনুষ্ঠিত এখন সংবাদমেল সম্বোধন কৰি আৰ এম চিৰ সভাপতি আফজল হক সৰকাৰে বিটিএডিত নিজকে ধৰ্মীয় সংখ্যালঘু ৰাইজৰ ত্ৰাণকৰ্তা বুলি ভৱা বদৰুদ্দিন আজমলে বিভাজনৰ ঘৃণনীয় ৰাজনীতিৰে শান্তিৰ বাতাবৰন ঘূৰি অহা বিটিএডিত অশান্তিৰ বিষবাস্প বিয়পোৱাৰ গুৰুত্বৰ অভিযোগ উত্থাপন কৰিছে৷ ইমানেই নহয় ইউপিপিএল দলক সমৰ্থন জনোৱা এ আই ইউ ডি এফ দলক ধৰ্মীয় সংখ্যালঘু ৰাইজক নিৰ্বাচনৰ নামত বিভান্ত নকৰিবলৈ সকীয়াই দি বিটিএডিত শান্তি,সম্প্ৰীতি আৰু উন্নয়নৰ ধ্বজাৰে সকলো জাতি জনগোষ্ঠীক আকোঁৱালি লোৱা বিপিএফ দলৰ প্ৰাৰ্থীক লোকসভা নিৰ্বাচনত বিপুল ভোটত জয়যুক্ত কৰিবলৈ আহবান জনাইছে ৷

কোকৰাঝাৰ, ৫ এপ্ৰিলঃ কোকৰাঝাৰ সমষ্টিত এবছু সমৰ্থিত এই পি পি এলৰ প্ৰাৰ্থীক মুকলিকৈ সমৰ্থন আগবঢ়াই বিপদত পৰিছে বদৰুদ্দিন আজমল ।
বিটিএডি অঞ্চলত বসবাস কৰা বিশেষকৈ ধৰ্মীয় সংখ্যালঘূ ৰাইজে বিটিচিৰ শাসনাধিষ্ঠিত বিপিএফ দলৰ চৰকাৰৰ সৈতে থাকি সম্প্ৰদায়টোৰ উন্নয়নৰ কথা চিন্তা কৰাৰ সময়তে এআইইউডিএফ দলৰ সভাপতি বদৰুদ্দিন আজমলে ইয়াত থকা ধৰ্মীয় সংখ্যালঘু ৰাইজৰ উন্নয়নৰ কথা চিন্তা নকৰি বিটিচিৰ বাহিৰৰ পৰাই অঞ্চলটোৰ ধৰ্মীয় সংখ্যালঘু ৰাইজক বিপথে পৰিচালিত কৰাৰ যি ফন্দি পাতিছে সেয়া কেতিয়াও হ'বলৈ দিয়া নহব বুলি সকীয়াই দিছে আৰ এম চিৰ সভাপতি আফজাল হক সৰকাৰে ৷ উল্লেখ্য যে, পৃথক বড়োলেণ্ডৰ দাবীৰে আলোড়ন সৃষ্টি কৰা এবছু-ইউপিপিএল দলৰ প্ৰাৰ্থী উৰ্খাও গৌড়া ব্ৰহ্মক কি কাৰণত সমৰ্থন আগবঢ়ালে সেয়া ৰাজহুৱা কৰিবলৈও আহ্বান জনাই সচাঁকৈয়ে যদি বিটিচিৰ মুছলমান লোকৰ মংগল বিচাৰে তেন্তে ইউ পি পি এলৰ প্ৰতি থকা সমৰ্থন উঠাও ল'বলৈ দাবী উত্থাপন কৰে আৰ এম চিৰ সভাপতিগৰাকীয়ে ৷

আনহাতে বড়ো আৰু অবড়োৰ নাম লৈ ৰাজনীতি কৰা সাংসদ নৱ কুমাৰ শৰনীয়াকো ক্ষুৰধাৰ সমালোচনা কৰি সাংবাদিকমেলত আৰএমচিৰ সভাপতি আফজাল হক সৰকাৰে বিটিচিৰ মুছলমান ৰাইজে তেওঁৰ প্ৰতি মোহভঙ্গ হৈছে বুলি দাবী কৰি নৱ কুমাৰ শৰনীয়াক এজন অপৰিপক্ক নেতা আখ্যা দিয়ে ৷ আজিৰ সাংবাদিকমেলত আৰএমচিৰ সাধাৰন সম্পাদক আয়নাল হককে ধৰি কেইবাগৰাকী নেতা উপস্থিত আছিল ৷