ভাৰত-বাংলা সীমান্তৰ সুৰংগৰ ঘটনাক গাপ দিয়াৰ চেষ্টা বি এছ এফৰ

মঙলবাৰে সীমা সুৰক্ষা বাহিনীৰ কাছাৰ ফ্ৰণ্টিয়াৰৰ উপ মহাপৰিদৰ্শক, অসম আৰক্ষীৰ দক্ষিণ অসম প্ৰান্তৰ উপ মহাপৰিদৰ্শক, কৰিমগঞ্জৰ জিলা উপায়ুক্ত,আৰক্ষী অধীক্ষকসহ এটা দল উপস্থিত হয় ভাৰত-বাংলা সীমান্তত ৷ সীমান্তৰ বহু চৰ্চিত অঞ্চলটো পৰিদৰ্শনৰ অন্তত কৰিমগঞ্জৰ উপায়ুক্তৰ কাৰ্যালয়ত এক ৰুদ্ধদ্বাৰ বৈঠকত মিলিত হয় দলটো ৷

কৰিমগঞ্জ,6 জানুৱাৰী :ভাৰত-বাংলাদেশৰ সীমান্ত সমস্যা দীৰ্ঘদিনৰ পৰাই গুৰুত্বপূৰ্ণ সমস্যা হিচাপে বিবেচিত হৈ আহিছে ৷ কেইদিনমন পূৰ্বে সীমান্ত পথৰ তলত থকা হিউম পাইপেৰে বাংলাদেশী নাগৰিকে অহা-যোৱা কৰাৰ খবৰ সংবাদ মাধ্যমত প্ৰকাশিত হৈছিল ৷ এই বাতৰি প্ৰকাশ পোৱাৰ পিছতে তৎপৰ হৈ উঠিছে সীমা সুৰক্ষা বাহিনীৰ লগতে অসম আৰক্ষী ৷

মঙলবাৰে সীমা সুৰক্ষা বাহিনীৰ কাছাৰ ফ্ৰণ্টিয়াৰৰ উপ মহাপৰিদৰ্শক, অসম আৰক্ষীৰ দক্ষিণ অসম প্ৰান্তৰ উপ মহাপৰিদৰ্শক, কৰিমগঞ্জৰ জিলা উপায়ুক্ত,আৰক্ষী অধীক্ষকসহ এটা দল উক্ত অঞ্চলত উপস্থিত হৈ ঘটনাস্থলী পৰিদৰ্শন কৰে ৷ সীমান্তৰ বহু চৰ্চিত অঞ্চলটো পৰিদৰ্শনৰ অন্তত কৰিমগঞ্জৰ উপায়ুক্তৰ কাৰ্যালয়ত এক ৰুদ্ধদ্বাৰ বৈঠকত মিলিত হয় দলটো ৷ কিন্তু এই বৈঠকত আৰক্ষীৰ শীৰ্ষ নেতাসকলৰ সন্মুখত বিষয়টো গাপ দিবলৈ চেষ্টা চলাই সীমা সুৰক্ষা বাহিনীয়ে ৷ উল্লেখ্য যে,আৰক্ষীৰ শীৰ্ষ নেতাসকল অঞ্চলটো পৰিদৰ্শন কৰাৰ সময়ত তাত সাংবাদিকৰ প্ৰৱেশ নিষিদ্ধ কৰা আছিল ৷ বৈঠকৰ পিছতো সাংবাদিকৰ আগত মুখ খোলাৰ পৰা বিৰত থাকে সীমা সুৰক্ষা বাহিনীৰ কাছাৰ ফ্ৰণ্টিয়াৰৰ উপ মহাপৰিদৰ্শক গৰাকী ৷

অৱশ্যে এই সন্দৰ্ভত অসম আৰক্ষীৰ দক্ষিণ অসম প্ৰান্তৰ উপ মহাপৰিদৰ্শক দিলীপ কুমাৰ দে’য়ে হিউম পাইপসমূহ বিভিন্ন কাৰণত বিনষ্ট হোৱাৰ পৰিপ্ৰেক্ষিতত ইয়াৰ মেৰামতিৰ প্ৰয়োজন থকা বুলি ব্যক্ত কৰে ৷ যাৰ বাবে কেন্দ্ৰীয় গড়কাপ্তানী বিভাগে ইয়াৰ মেৰামতিৰ কাম সম্পন্ন কৰিব ৷ কিন্তু হিউম পাইপৰ মাজেৰে মানুহ অহা-যোৱা কৰাতো অসম্ভৱ বুলি মন্তব্য কৰে অসম আৰক্ষীৰ শীৰ্ষ বিষয়াগৰাকীয়ে ৷ তদুপৰি 2018 চনৰ অনুৰূপ ঘটনা সংঘটিত হোৱাৰ বিষয়টো অস্বীকাৰ কৰে ৷

সীমা সুৰক্ষা সংস্থাই এই বিষয়ে ভুৱা তথ্য দাঙি ধৰিলেও অসম আৰক্ষীয়ে এনে বিষয় অজ্ঞাতে নাৰাখে বুলি ব্যক্ত কৰে আৰক্ষী বিষয়াগৰাকীয়ে ৷ 2018 চনত 7 গৰাকী বাংলাদেশী নাগৰিকে গৰু চুৰিৰ উদ্দেশ্যে উক্ত অঞ্চলৰে প্ৰৱেশ কৰিছিল অসমৰ ভূমিত ৷ বাংলাদেশী নাগৰিকৰ দলটোৱে দুগৰাকী ভাৰতৰ ব্যক্তিক আক্ৰমণ কৰে যদিও আৰক্ষীয়ে দলটোৰ দুগৰাকী ব্যক্তিক আটক কৰে ৷

লগতে চাওকঃগুৰুতৰভাৱে অসুস্থ প্ৰখ্যাত বিজ্ঞানী ডঃ জিতেন্দ্ৰ নাথ গোস্বামী