হাজোৰ সমাজ কল্যাণ বিভাগত নিযুক্তি কেলেংকাৰীৰ অভিযোগ

চিকিৎসাধীন অৱস্থাত থকা কৰ্মীক বঞ্চিত কৰি হাজোৰ সমাজ কল্যাণ বিভাগত অবৈধ নিযুক্তিৰ অভিযোগ। নীতি বৰ্হিভূতভাৱে টকাৰ বিনিময়ত চাকৰি দিয়াৰ অভিযোগ CDPO কানন তালুকদাৰ আৰু কৰ্মচাৰী চিৰাজুদ্দিন শ্বেইখৰ বিৰুদ্ধে ।

হাজো, 27 মে': হাজোৰ সমাজ কল্যাণ বিভাগত ভয়াৱহ নিযুক্তি কেলেংকাৰী। নীতি বৰ্হিভূতভাৱে টকাৰ বিনিময়ত চাকৰি দিয়াৰ অভিযোগ CDPO কানন তালুকদাৰ আৰু কৰ্মচাৰী চিৰাজুদ্দিন শ্বেইখৰ বিৰুদ্ধে । 1991 চনৰ ফেব্ৰুৱাৰী মাহৰ পৰাই গৰোবৰিৰ অংগণবাড়ী কেন্দ্ৰত কাম কৰি অহা হাজোৰ চুৰমা খাতুন নামৰ মহিলাগৰাকীয়ে চিকিৎসাধীন হৈ থকাৰ সুযোগ লৈ টকাৰ বিনিময়ত কৰ্মী গৰাকীৰ ঠাইত আন মহিলাক নিযুক্তি দিয়াৰ অভিযোগ CDPOৰ বিৰুদ্ধে ৷

চিকিৎসালয়ৰ পৰা নিজৰ চিকিৎসা সম্পূৰ্ণ কৰি ঘৰলৈ উভতি আহিয়েই এই কথা গম পোৱাৰ পাচতে হতভম্ব হৈ পৰে মহিলাগৰাকী ৷ কেৱল আন মহিলাক নিযুক্তি দিয়াই নহয়, পূৰ্বৰ কৰ্মী গৰাকীৰ দৰমহাৰ ধনৰ লগতে বকেয়াৰ বহু ধনো ৰেছুমা বেগমৰ একাউন্টলৈ ট্ৰান্সফাৰ কৰি দিয়ে CDPO কানন তালুকদাৰে ৷ মহিলাগৰাকীৰ ক্ষেত্ৰত বিভাগীয় কৰ্তৃপক্ষৰ এনে ব্যৱহাৰত ক্ষুব্ধ হৈ পৰা মহিলাগৰাকীয়ে এতিয়া ন্যায় বিচাৰি হাবাথুৰি খাইছে ৷ কাষ চাপিছে হাজো আৰক্ষীৰ। হাজো আৰক্ষীৰ তদন্তৰ পাচতহে ওলাই পৰিব সমগ্ৰ ঘটনাৰ আঁৰৰ ৰহস্য ৷