গুৱাহাটী, ২ মাৰ্চঃৰাজ্যৰ চৌদিশে এতিয়া চুলাই ঘাটি বন্ধৰ বিৰুদ্ধে প্ৰতিবাদ । বাইহাটা চাৰিআলিতো দেখা গ'ল অনুৰূপ দৃশ্য। বাইহাটা চাৰিআলিত শনিবাৰে শ শ পুৰুষ মহিলাই হাতে হাতে প্লে' কাৰ্ড লৈ ৰাজপথলৈ ওলাই আহি চুলাই ঘাটি বন্ধৰ বিৰুদ্ধে প্ৰতিবাদ সাব্যস্ত কৰে ।
স্বেচ্ছাসেৱী অনুষ্ঠান প্ৰক্ষালন আৰু মহিলা অভিযোগ নিৰাময় কোষৰ উদ্যোগত বাইহাটা চাৰিআলিৰ বৈশ্য চুবুৰীৰ পৰা থানালৈ শ শ পুৰুষ মহিলাই প্ৰতিবাদী সমদল উলিয়াই । চুলাই মদ বন্ধ কৰক, ধাবাত মদ নচলিব, তীৰ খেল বন্ধ কৰক আদি বিভিন্ন শ্ল'গানেৰে প্ৰতিবাদী দলটোৱে বাইহাটাৰ আকাশ বতাহ কঁপাই তোলে । ইয়াৰ ওপৰিও প্ৰতিবাদী দলটোৱে পদব্ৰজে সমদলেৰে আহি বাইহাটা চাৰিআলি থানাৰ ভাৰপ্ৰাপ্ত আৰক্ষী বিষয়াক এখন স্মাৰক পত্ৰ প্ৰদান কৰে । ইপিনে যদি ১৫ দিনৰ ভিতৰত মদ, জুৱা, তীৰ আদি বন্ধ নহয় তেনেহ'লে বাইহাটা চাৰিআলিৰ প্ৰৱেশ দ্বাৰত অৱস্থান ধৰ্মঘট কৰাৰ হুংকাৰ দিয়ে প্ৰতিবাদী দলটোৱে।