শ্ৰমিকৰ মাজত সাহায্য বিতৰণ বিধায়ক ৰেকিবুদ্দিন আহমেদৰ

কৰ’ণা কালত ক্ষতিৰ সন্মুখীন হোৱা নিৰ্মাণ শ্ৰমিকসকলৰ ওচৰত থিয় দিলে ছয়গাঁৱৰ বিধায়ক ৰেকিবুদ্দিন আহমেদে ৷ সোমবাৰে ২০০ গৰাকী নিৰ্মাণ শ্ৰমিকক সাহায্য প্ৰদান কৰিলে বিধায়ক গৰাকীয়ে ৷

ছয়গাঁও,8 জুন: কৰ’ণা মহামাৰীৰ বাবে ৰাজ্যত সম্পূৰ্ণ লক ডাউন দিয়া হোৱা নাই যদিও আংশিক লক ডাউন তথা অধিক সান্ধ্য আইনৰ বাবে বহু লোকৰ জীৱন আৰু জীৱিকাক লৈ হাহাকাৰৰ সৃষ্টি হৈছে ৷ আন আন ক্ষেত্ৰৰ লগতে নিৰ্মাণ শ্ৰমিকসকলৰো পানীত হাঁহ নচৰাৰ অৱস্থাৰ সৃষ্টি হৈছে ৷

কৰ’ণা মহামাৰীৰ বাবে যথেষ্ট ক্ষতিৰ সন্মুখীন হোৱা ছয়গাঁৱৰ নিৰ্মাণ শ্ৰমিকসকলক শেহতীয়াকৈ সহায়ৰ হাত আগবঢ়ালে ছয়গাঁৱৰ বিধায়ক ৰেকিবুদ্দিন আহমেদে ৷ সোমবাৰে বিধায়ক গৰাকীয়ে কামৰূপ জিলা অগ্ৰগামী নিৰ্মাণ শ্ৰমিক ইউনিয়নৰ ডুৱজেনীত থকা কাৰ্যালয়ত নিৰ্মাণ শ্ৰমিকসকলক এই সাহায্য প্ৰদান কৰে ৷

ছয়গাঁও অঞ্চলৰ ২০০ গৰাকী নিৰ্মাণ শ্ৰমিকক বিধায়কগৰাকীয়ে একোটাকৈ খাদ্য সামগ্ৰীৰ টোপোলা প্ৰদান কৰে ৷ ইয়াৰ লগতে বিধায়ক গৰাকীয়ে মহামাৰীৰ এই সময়ত সকলোকে একতাৰে কাম কৰাৰ বাবেও আহ্বান জনায় ৷ অনুষ্ঠানটোত বিধায়ক গৰাকীৰ লগতে ছয়গাঁৱৰ চক্ৰ বিষয়া জয়ন্ত বৰা উপস্থিত থাকে ৷

লগতে পঢ়ক:বিবদমান অসম-নাগালেণ্ড সীমান্ত পৰিদৰ্শন গোলাঘাটৰ উপায়ুক্তৰ