HSLC পৰীক্ষাত অসমৰ ভিতৰতে দ্বিতীয় স্থান লাভ কৰা ভুয়সী মেধিক ৰঙিয়াত সম্বৰ্ধনা

সদ্যঘোষিত হাইস্কুল শিক্ষান্ত আৰু হাইমাদ্ৰাছা পৰীক্ষাত সুখ্যাতিৰে উত্তীৰ্ণ হৈ গৌৰৱ কঢ়িয়ালে বহু মেধাবী ছাত্ৰ-ছাত্ৰীয়ে । ৰাজ্যৰ ভিতৰতে দ্বিতীয় স্থান লাভ কৰিছিল ভুয়সী মেধিয়ে । শুকুৰবাৰে মেধাবী ছাত্ৰীগৰাকীক সম্বৰ্ধনা জ্ঞাপন কৰে ৰঙিয়াৰ ভিঠেলীপাৰাৰ ৰাইজে (Felicitation ceremony in Rangia) ।

ৰঙিয়া,১০ জুন:সদ্যঘোষিত হাইস্কুল শিক্ষান্ত পৰীক্ষাত(HSLC Exam Result 2022) সুখ্যাতিৰে জিলিকিল বহুকেইগৰাকী ছাত্ৰ-ছাত্ৰী । ছাত্ৰ-ছাত্ৰীসকলক উৎসাহ দিয়াৰ উদ্দেশ্যে সম্বৰ্ধনা জ্ঞাপন কৰিছে বহু অনুষ্ঠান প্ৰতিষ্ঠানে । হাইস্কুল শিক্ষান্ত পৰীক্ষাত অসমৰ ভিতৰতে দ্বিতীয় স্থান লাভ কৰা ভুয়সী মেধিক শুকুৰবাৰে সম্বৰ্ধনা জ্ঞাপন কৰে ৰঙিয়া ভিঠেলীপাৰাৰ ৰাইজে(Felicitation ceremony in Rangia) ।

ভিঠেলীপাৰাৰ বাসুদেৱ সত্ৰত আয়োজন কৰা এখন ৰাজহুৱা সভাত গাঁওখনৰ ৰাইজে একত্ৰিত হৈ ভুয়সী মেধিক জ্ঞাপন কৰে সম্বৰ্ধনা । এখন ফুলাম গামোছা, এটা ফুলাম জাপি আৰু এটা গছ পুলিৰে সম্বৰ্ধনা জনাই মেধাবী ছাত্ৰীগৰাকীক । ভুয়সীয়ে ৰাইজৰ সমাদৰ পাই উৎফুল্লিত হৈ পৰা বুলি মন্তব্য প্ৰকাশ কৰে ।

উল্লেখ্য যে পিতৃ কৰ্মসূত্ৰে নলবাৰীৰ বাসিন্দা হলেও পিতৃৰ জন্মস্থান ভিঠেলীপাৰালৈ সুনাম কঢ়িয়াই আনিবলৈ পাই যথেষ্ট সুখী বুলি ব্যক্ত কৰে ছাত্ৰীগৰাকীয়ে । ভৱিষ্যতে এগৰাকী সু চিকিৎসক হৈ ৰাইজৰ সেৱাত ব্ৰতী হোৱাৰ সপোন পুহি ৰখাৰ কথাও উল্লেখ কৰে ভুয়সী মেধিয়ে ।

ইফালে উক্ত অনুষ্ঠানতে ২০২১ আৰু ২০২২ চনত অঞ্চলটোৰ পৰা ভাল ফলাফল দেখুওৱা পোন্ধৰ গৰাকী ছাত্ৰ ছাত্ৰীকো সম্বৰ্ধনা জ্ঞাপন কৰে ৰাইজে । সকলোৰে উজ্বল ভৱিষ্যত কামনা কৰে অঞ্চলটোৰ ৰাইজে ।

লগতে পঢ়ক:মন্ত্রী সিংহলৰ হাততে আছে গুৱাহাটী উন্নয়ন বিভাগৰ দায়িত্ব