বিৰোধী ঐক্য় মঞ্চক প্ৰত্যুত্তৰ মুখ্যমন্ত্ৰীৰ
গুৱাহাটী,২৭ অক্টোবৰ: ২০২৪ ৰ লোকসভা নিৰ্বাচনলৈ টঙালি বান্ধিছে শাসক-বিৰোধী সকলোৱে । সমানে বৃদ্ধি পাইছে বাকযুদ্ধ । এইবাৰ বিৰোধী ঐক্যমঞ্চৰ বিৰুদ্ধে সৰৱ হৈছে মুখ্যমন্ত্ৰী হিমন্ত বিশ্ব শৰ্মা । বিৰোধী ঐক্যমঞ্চৰ ১৩ টা বিৰোধী ৰাজনৈতিক দলে বিজেপিক প্ৰতিৰোধ কৰিবলৈ বলিদান অৰ্থাৎ আত্মবলিদান কৰাৰ সিদ্ধান্তক কটাক্ষ কৰে মুখ্যমন্ত্ৰী হিমন্ত বিশ্ব শৰ্মাই ।
শুকুৰবাৰে গুৱাহাটীত অনুষ্ঠিত এক অনুষ্ঠানত অংশগ্ৰহণ কৰি মুখ্যমন্ত্ৰী হিমন্ত বিশ্ব শৰ্মাই সাংবাদিকৰ আগত কয় যে অসমৰ ৰাইজে ৰাজনৈতিক দলৰ পৰা বলিদান নিবিচাৰে । অসমৰ ৰাইজে কেৱল কাম আৰু উন্নয়ন বিচাৰে । বলিদান এক ব্যক্তিগত বিষয় বুলি মুখ্যমন্ত্ৰীয়ে মন্তব্য কৰে । উল্লেখযোগ্য যে, যোৱা বৃহস্পতিবাৰে লোকসভা নিৰ্বাচন সম্পৰ্কত বিৰোধী ঐক্যমঞ্চৰ ১৩ টা বিৰোধী ৰাজনৈতিক দলে গুৱাহাটীত এক গুৰুত্বপূৰ্ণ বৈঠকত মিলিত হৈছিল ।