কংগ্ৰেছৰ পৰা পদত্যাগ বিশ্বজিৎ ৰায়ৰ

বিটিচিত বিজেপিৰ নিৰ্বাচনী সভাত অংশগ্ৰহণ কৰি দেওবাৰে দলৰ শ্ব'কজৰ সন্মুখীন হৈছিল বিশ্বজিৎ ৰায় ৷

গুৱাহাটী, 16 নৱেম্বৰ: কংগ্ৰেছ দলত আৰম্ভ হৈছে ব্যাপক খহনীয়া । নিৰ্বাচনৰ প্ৰাক মুহুৰ্তত দল ত্যাগ কৰিছে এজনৰ পাছত আনজন নেতাই ৷ এইবাৰ কংগ্ৰেছ দলৰ পৰা পদত্যাগ কৰে প্ৰদেশ কংগ্ৰেছৰ সাধাৰণ সম্পাদক তথা প্ৰাক্তন কোঁচ-ৰাজবংশী জনগোষ্ঠীয় নেতা বিশ্বজিৎ ৰায়ে ৷ সোমবাৰে ৰিপুণ বৰাৰ হাতত পদত্যাগ পত্ৰ অৰ্পণ কৰে নেতাগৰাকীয়ে ৷ দিশপুৰ প্ৰেছ ক্লাবত এক সংবাদমেলযোগে এই কথা সদৰী কৰে নেতাগৰাকীয়ে ৷ বিটিচিত বিজেপিৰ নিৰ্বাচনী সভাত অংশগ্ৰহণ কৰি দেওবাৰে দলৰ শ্ব'কজৰ সন্মুখীন হৈছিল বিশ্বজিৎ ৰায় ৷

প্ৰদেশ কংগ্ৰেছৰ সাধাৰণ সম্পাদক হৈ থকা অৱস্থাতেই বিজেপিৰ নিৰ্বাচনী সভাত অংশগ্ৰহণ কৰা কার্যই কংগ্ৰেছৰ আভ্যন্তৰত তীব্ৰ প্ৰতিক্ৰিয়াৰ সৃষ্টি কৰিছিল ৷ দলীয় অনুশাসন ভংগ কৰাৰ অভিযোগত তেওঁক কিয় অভিযুক্ত কৰা নহ’ব, সেই সন্দর্ভত তিনিদিনৰ ভিতৰত উত্তৰ দিবলৈ দেওবাৰে প্ৰদেশ কংগ্ৰেছে জাননী জাৰি কৰিছিল ৷

উল্লেখ্য যে, ১৩ নৱেম্বৰত কোকৰাঝাৰ জিলাৰ ছালাকাটিত অনুষ্ঠিত বিজেপিৰ এখন নিৰ্বাচনী সভাত ডঃ হিমন্ত বিশ্ব শর্মা আৰু বিজেপিৰ ৰাজ্যিক সভাপতি ৰণজিৎ কুমাৰ দাসৰ সৈতে বিশ্বজিৎ ৰায় উপস্থিত আছিল ৷ এই সন্দৰ্ভত বিশ্বজিৎ ৰায়ে মন্তব্য কৰে যে, কোঁচ ৰাজবংশী জনজাতিকৰণৰ সন্দৰ্ভতহে তেওঁ সভাখনত উপস্থিত হৈছিল, কিন্তু সেইখন নিৰ্বাচনী সভা বুলি তেওঁ জ্ঞাত নাছিল ৷

লগতে পঢ়ক: বৰপেটাত ৰাষ্ট্ৰীয় প্ৰেছ দিৱস পালন