টীয়ক, 28 মেঃ ৰাষ্ট্ৰীয় ঘাইপথ সম্প্ৰসাৰণ কামত জড়িত হৈ থকা জি ডি চি এল নামৰ নিৰ্মাণকাৰী সংস্থাৰ বিৰুদ্ধে প্ৰতিবাদ সাব্যস্ত কৰে অসমপ্ৰেমী যুৱ ছাত্ৰ সমাজ নামৰ সংগঠনটোৱে ৷ উজনি অসমৰ টীয়কত 37নং ৰাষ্ট্ৰীয় ঘাইপথৰ সম্প্ৰসাৰণত জড়িত হৈ থকা সংস্থাটোৰ বিৰুদ্ধে এইদৰে মঙলবাৰে প্ৰতিবাদ সাব্যস্ত কৰে ছাত্ৰ সংগঠনটোৱে ৷
ছাত্ৰ সংগঠনটোৱে প্ৰকাশ কৰা অনুসৰি, নিৰ্মাণকাৰী সংস্থাটোৱে পথটোৰ মেৰামতিৰ নামত হেমাহি কৰাৰ লগতে সম্প্ৰসাৰণৰ কামো অতি লেহেমীয়া গতিৰে কৰি আছে ৷ বিগত সময়ত ৰাজ্যৰ মুখ্যমন্ত্ৰীয়ে উপস্থিত হৈ ক্ষীপ্ৰতাৰে পথঠোৰ মেৰামতিৰ কাম কৰাৰ নিৰ্দেশ দিয়াৰ পিচটো সেই নিৰ্দেশ অমান্য কৰিছে সংস্থাটোৱে ৷ ইয়াৰ ফলত জি ডি ছি এলৰ অধীনত থকা যোৰহাট বাইপাছৰ পৰা জাঁজী দলঙলৈকে নিতৌ সৰু বৰ দুৰ্ঘটনা সংঘটিত হোৱাৰ লগতে কেইবাজনো ব্যক্তিয়ে প্ৰাণ হেৰুৱাব লগীয়া হৈছে ৷ ইতিমধ্যে ছাত্ৰ সংগঠনটোৱে নিৰ্মাণকাৰী সংস্থাটোৰ মেলেঙস্থিত কাৰ্যালয়ৰ প্ৰৱেশ পথ বন্ধ কৰি দিয়াৰ লগতে টীয়ক এক প্ৰতিবাদী কাৰ্যসূচীও ৰূপায়ন কৰে ৷