মৰাণ, 25 ছেপ্তেম্বৰ: ক্ৰমাৎ ভাল দিন আহিবলৈ ধৰিছে অসমীয়া বোলছবি জগতলৈ ৷ ইখনৰ পিছত সিখন অসমীয়া চলচ্চিত্ৰই সমৃদ্ধ কৰি তুলিছে অসমীয়া ছবিজগত ৷ ইতিমধ্যে মুক্তি লাভ কৰা জুবিন গাৰ্গৰ "কাঞ্চনজংঘা" আৰু ৰিমা দাসৰ "বুলবুল কেন চিং" ৰ পিছত পুনৰ 11 অক্টোবৰত অসমৰ প্ৰতিটো ছবিগৃহতেই মুক্তি লাভ কৰিব জনপ্ৰিয় অভিনেতা যতীন বৰাই পৰিচালনা কৰা "ৰত্নাকৰ" ছবিখনে ৷
ইতিমধ্যে "ৰত্নাকৰ" ছবিখনৰ প্ৰচাৰৰ বাবে অসমৰ শদিয়াৰ পৰা ধুবুৰীলৈকে ঘূৰিছে টীম ৰত্নাকৰ ৷ মঙলবাৰে ছবিখনৰ প্ৰচাৰৰ বাবে মৰাণ মহাবিদ্যালয়ত উপস্থিত হয় পৰিচালক যতীন বৰা,অভিনেত্ৰী বৰষা ৰাণী বিষয়াৰ লগতে টীম ৰত্নাকৰৰ বহুকেইগৰাকী কলাকৌশলী ৷ উল্লেখ্য যে মৰাণত টীম 'ৰত্নাকৰ'ক সংগ দিয়ে জনপ্ৰিয় শিল্পী বিপিন চাউদাঙে ৷ মহাবিদ্যালয় খনৰ ছাত্ৰ-ছাত্ৰী,শিক্ষক-শিক্ষয়ত্ৰী সকলৰ সৈতে অনুষ্ঠিত হোৱা এক অনুষ্ঠানত 11 অক্টোবৰত অসমৰ সমূহ ছবিগৃহতে শুভমুক্তি লাভ কৰিবলগীয়া ছবিখন সকলোৱে সকলোকে উপভোগ কৰিবলৈ আহ্বান জনাই পৰিচালক যতীন বৰা আৰু অভিনেত্ৰী বৰষা ৰাণী বিষয়াই ৷