মৰাণ, 2 ডিচেম্বৰ : ব্যতিক্ৰমী ৰূপত এগৰাকী জনপ্ৰতিনিধি ৷ পথাৰত ধান কটাৰ লগতে ডাঙৰী কঢ়িয়াইছে বিধায়কজনে (Paddy harvesting by MLA) । আনকি দাৱনীৰ লগত একলগে বহি চাহ-জলপান খোৱাৰ লগতে জুতি ল'লে ৰাবাব টেঙাৰো ।
নাহৰকটীয়াৰ চাচনী খাটোৱা গাঁৱৰধাননি পথাৰত এইবাৰ ব্যতিক্ৰমী ৰূপত দেখা গ'ল নাহৰকটীয়াৰ বিধায়ক তৰংগ গগৈ (MLA Taranga Gogoi)ক । ধাননি পথাৰখনত দাৱনী সকলৰ সৈতে এফালৰ পৰা ধানৰ মুঠি কাটি গৈছে যুৱ বিধায়কজনে । ধান কটাৰ লগতে ডাঙৰীও কঢ়িয়াইছে বিধায়ক তৰংগয়ে ।
আঘোণৰ ভৰ দুপৰীয়া পথাৰৰ মাজত দাৱনীসকলৰ সৈতে চাহ-জলপান আৰু ৰবাব টেঙাৰ জুতি লোৱাত ব্যস্ত বিধায়ক গগৈ ৷ মূলতঃ নাহৰকটীয়াৰ জনতাই যাতে কৃষি কাৰ্যৰ লগতে বিভিন্ন ক্ষেত্ৰত ইজনে সিজনক সহায় কৰি এক হৈ সমাজখন যাতে আগুৱাই নিয়ে, তাৰেই এক উৎকৃষ্ট নিদৰ্শন দাঙি ধৰিলে বিধায়ক তৰংগ গগৈয়ে ।
দিনটো পথাৰত দাৱনীৰ সৈতে ধান কটাৰ লগতে ৰবাব টেঙাৰ জুতি লৈ নষ্টালজিক হৈ পৰে নাহৰকটীয়াৰ বিধায়ক গৰাকী ৷ ইফালে, বিধায়কজনক কাষতে পাই একপ্ৰকাৰ উৎফুল্লিত হৈ পৰিল দাৱনীসকলো । ভিভিআইপি আচৰণৰ সলনি এজন সহজ সৰল চহা কৃষকৰ ৰূপত জনতাৰ কাষত থিয় হোৱাত স্বাভাৱিকতে আনন্দিত হৈ পৰিছে চাচনী খাটোৱা গাঁওবাসী ৷ সমাজক একত্ৰিত কৰি ৰখাৰ স্বাৰ্থত বিধায়ক তৰংগ গগৈয়ে লোৱা এনে ব্যতিক্ৰমী প্ৰচেষ্টাক এতিয়া সকলোৱে সলাগ জনাইছে ৷