ধুবুৰী,১জুলাই: যি সময়ত সমগ্ৰ দেশৰ লগতে অসমো মহামাৰী কৰণাক লৈ আতংকিত হৈ আছে সেই সময়তেই ভূতৰ ওপৰত দানৱ পৰাদি আহি পৰিছে ৰাজ্যৰ দ্বিতীয়টো বান । ৰাজ্যৰ অন্যান্য প্ৰান্তৰ দৰে দক্ষিণ শালমাৰা আৰু মানকাচাৰতো ব্ৰহ্মপুত্ৰ নদীৰ বাঢ়নি পানীয়ে চলাইছে তাণ্ডৱ । ফলত বানৰ কৱলত পৰি অন্ন বস্ত্ৰ আৰু বাসস্থানৰ অভাৱত কৰিব লগা হৈছে হাহাকাৰ ৷
বানৰ কৱলত দক্ষিণ শালমাৰা বিধান সভা সমষ্টিটোৰ ৯০ শতাংশ ভূমি জলমগ্ন হৈ পৰাৰ লগতে পথসমূহো এতিয়া পানীৰ তলত । ফলত বন্ধ হৈ পৰিছে যাতায়াতো । কেৱল নাৱৰ জৰিয়তে ভৰ বাৰিষাৰ পানীত বিপদসংকূল ভাৱে যাতায়ত কৰিব লগা হৈছে এইসকলে । বানৰ এনে ভয়ংকৰ তাণ্ডৱত জাহ গৈছে খাদ্যবস্তুকে ধৰি সকলো সামগ্ৰী। ফলত বানাক্ৰান্তৰ মাজত খাদ্য সামগ্ৰীৰ সংকটেও দেখা দিয়া পৰিলক্ষিত হৈছে । বিশুদ্ধ খোৱা পানীৰ অভাৱ, শৌচাগাৰৰ অভাৱ তথা ঔষধৰ অভাবে এতিয়া চিন্তিত কৰি তুলিছে সকলোকে।