কুলশী নদীৰ ভগ্ন মাথাউৰি নিৰ্মাণ কৰিলে স্থানীয় ৰাইজে

চৰকাৰে নহয় কলাইগাঁৱত বানাক্ৰান্ত লোকেই নিৰ্মাণ কৰিলে মথাউৰি । ১০ দিন ধৰি ৰাইজে শ্ৰমদান কৰি নিৰ্মাণ কৰি উলিয়ালে কুলশী নদীৰ মথাউৰি ।

দৰং, 2 আগষ্ট : ওদালগুৰি জিলাৰ কলাইগাঁৱত তৃতীয়টো বানত বিস্তৰ ক্ষতিসাধন হৈছে কৃষক ৰাইজৰ । ভূটান পাহাৰৰ পৰা বৈ অহা কুলশী নদীয়ে কলাইগাঁও বিধানসভা সমষ্টিৰ অন্তৰ্গত বহু কেইখন গাঁৱৰ কৃষক ৰাইজৰ খেতিপথাৰকে ধৰি বিনষ্ট কৰিছে বহু সা-সম্পত্তি । কুলশী নদীৰ বাঢ়নী পানীৰ ফলত খাছৰনথলি গাঁৱত মথাউৰি ভঙাৰ ফলত বহুকেইখন গাঁৱৰ ৰাইজৰ মাজত হাহাকাৰ পৰিবেশৰ সৃষ্টি হৈছে ।

বিশেষকৈ কলাইগাঁও ৰাজহ চক্ৰৰ অন্তৰ্গত ৰনথলিগাঁও, খাছ ৰনথলি, উত্তৰ বোক্ৰাঝাৰ, দক্ষিণ বোক্ৰাঝাৰ, চেঙাপথাৰ, বৈদৰপাম, পাৰিয়াপাৰা আদি গাঁৱকে ধৰি প্ৰায় 17 খন গাঁৱত কুলশী নৈৰ বাঢ়নী পানীয়ে সৃষ্টি কৰিছে ব্যাপক সন্ত্ৰাসৰ । এনে অৱস্থাত চৰকাৰ তথা বিভাগীয় লোকে কোনো ধৰণৰ গুৰুত্ব প্ৰদান নকৰাত স্থানীয় ৰাইজে অৱশেষত নিজেই নিৰ্মাণ কৰিবলৈ ওলাই আহিল কুলশী নদীৰ ভগ্ন মাথাউৰি ।

ৰাইজে মিলি বিভিন্ন ধৰণে বাঁহ, বস্তা আৰু আৰ্থিক অনুদানেৰে দহদিন ধৰি নিজৰ শ্ৰমেৰে উক্ত মথাউৰিটো নিৰ্মাণ কৰি উলিয়ায় । অসম চৰকাৰৰ বিয়াগোম বিভাগসমূহৰ দায়িত্বহীনতাৰ বাবে ৰাইজে ভগ্ন মথাউৰিটো নিজে নিৰ্মাণ কৰিবলগীয়া হোৱাটো চৰম লজ্জাজনক বিষয় । উল্লেখযোগ্য যে, বছৰ বছৰ ধৰি মথাউৰি নিৰ্মাণৰ নামত কোটি কোটি টকাৰ ধন আৱন্তন হোৱাৰ পাচতো কোনো কাম নকৰাই এইয়াই সূচাইছে যে, জাতি-মাটিৰ শ্ল'গান দিয়া চৰকাৰখনৰ ৰাইজৰ প্ৰতি দায়বদ্ধতা কিমান ৷ ভুক্তভোগী বানাক্ৰান্ত ৰাইজৰ চৰকাৰ তথা বিভাগীয় কৰ্তৃপক্ষলৈ আহ্বান, শীঘ্ৰে স্থায়ীভাৱে মথাউৰিটো নিৰ্মাণ কৰি কৃষক ৰাইজক উপকৃত কৰক ।

লগতে পঢ়ক :পাঞ্জাৱ সুৰা ট্ৰেজেডি : মৃতকৰ সংখ্যা 86 লৈ বৃদ্ধি