বৰপেটা, অভয়াপুৰী, দেৰগাৱঁত উলহ-মালহেৰে স্বাধীনতা দিৱস উদযাপন

ৰাজ্যত বিভিন্ন প্ৰান্তৰ লগতে বৰপেটা, অভয়াপুৰী, দেৰগাৱঁত উদযাপন 73 সংখ্যক স্বাধীনতা দিৱস ৷

নিউজ ডেক্স , 15 আগষ্টঃ সমগ্ৰ দেশৰ লগতে বৃহস্পতিবাৰে ৰাজ্যৰ বিভিন্ন প্ৰান্তত ৭৩তম স্বাধীনতা দিৱস উলহ মালহেৰে পালন কৰা হয় ৷ বৰপেটা জিলাৰ কলগাছিয়াৰ ৰূপসী উন্নয়ন খণ্ডৰ কাৰ্যালয়ত আয়োজিত স্বাধীনতা দিৱসৰ পতাকা উত্তোলন কৰে খণ্ড উন্নয়ন বিষয়া মঞ্জুশ্ৰী ঘোষে ৷ ইয়াৰ লগতে কলগাছিয়াৰ বৰপেটা অসামৰিক চিকিৎসালয়ত অধীক্ষক ড০ ছামচুল আলম , কলগাছিয়া মহকুমা স্বাস্থ্য কেন্দ্ৰত স্বাস্থ্য বিষয়া ড০ নাজিৰুল ইছলাম , কলগাছিয়া ৰাজহ চক্ৰৰ কাৰ্যালয়ত চক্ৰ বিষয়া অজিত কলিতাই পতাকা উত্তোলন কৰে |

অনুৰূপ ভাৱে উলহ মালহেৰে কেন্দ্ৰীয়ভাৱে স্বাধীনতা দিৱস পালন কৰা হয় দেৰগাৱঁতো ৷ বিধায়ক ভবেন্দ্ৰ নাথ ভৰালীৰ উপস্থিতিত ৰাষ্ট্ৰীয় পতাকা উত্তোলন কৰে দেৰগাৱঁৰ চক্ৰ বিষয়া বনশ্ৰী মালাকাৰে ।একেদৰে মহকুমা প্ৰশাসনৰ উদ্যোগত অভয়াপুৰী গান্ধী ময়দানত অনুষ্ঠিত স্বাধীনতা দিৱসৰ কাৰ্যসূচীত ৰাষ্ট্ৰীয় পতাকা উত্তোলন কৰে উত্তৰ শালমাৰা মহকুমাৰ মহকুমাধিপতি মেঘনিধি দাহালে । সহস্ৰাধিক ৰাইজে অংশগ্ৰহণ কৰা অনুষ্ঠানটোত ভাৰতীয় স্বাধীনতা সংগ্ৰামী সকলৰ পৰিয়াল আৰু কৃৰ্তি ছাত্ৰ ছাত্ৰীক সম্বৰ্ধনা জনোৱাৰ লগতে স্বাধীনতা দিৱসৰ লগত সংগতি ৰাখি বিভিন্ন সাংস্কৃতিক অনুষ্ঠানো আয়োজন কৰা হয় ৷