দেৰগাওঁ,বৰপেটা, কৰিমগঞ্জত ৭৩ সংখ্যক স্বাধীনতা দিৱস উদযাপন

কলগাছিয়াত এন চি চি কেডেটছে ৰোগীৰ মাজত বিতৰণ কৰিলে ফলাহাৰ ৷ বৃহস্পতিবাৰে সমগ্ৰ ৰাজ্যৰ লগতে দেৰগাওঁ,বৰপেটা, কৰিমগঞ্জ জিলাতো উদযাপন কৰা হয় ৭৩ সংখ্যক স্বাধীনতা দিৱস ৷

নিউজ ডেক্স, 15 আগষ্টঃ দেশত 73 সংখ্যক স্বাধীনতা দিৱসৰ আনন্দৰ সময়তে গোলাঘাট জিলাৰ দেৰগাৱঁত অনুষ্ঠিত হয় এক সমাজ সেৱামূলক কাৰ্যসূচী ৷ স্বাধীনতা দিৱসৰ লগত সংগতি ৰাখি ১০০ গৰাকী ৰোগীক বিনামূলীয়া চিকিৎসা আৰু ঔষধ প্ৰদানৰ ব্যৱস্থা কৰে দন্ত চিকিৎসক পাৰ্থ জ্যোতি বৰাই ৷ স্থানীয় বিধায়ক ভবেন্দ্ৰ নাথ ভৰালীয়ে উদ্ধোধন কৰা এই কাৰ্যসূচীৰ শলাগ লয় দেৰগাঁৱৰ ৰাইজে ৷

ঠিক একেদৰে বৰপেটা জিলাৰ কলগাছিয়াস্থিত নৱজ্যোতি কলেজৰ প্ৰাক্তন এন চি চি কেডেটছৰ উদ্যোগত আৰু বৰ্তমান এন চি চি কেডেটছৰ সহযোগত গ্ৰহণ কৰা হয় এক ব্যতিক্ৰমী কাৰ্যসূচী । তেওঁলোকে কলগাছিয়াৰ বৰপেটা অসামৰিক চিকিৎসালয়ৰ ৰোগী সকললৈ ফলমূল বিতৰণ কৰাৰ লগতে সৰভোগ-কলগাছিয়া গড়কাপ্তানী পথেৰে স্বাধীনতা দিৱস উপভোগ কৰিবলৈ অহা প্ৰতিজন ব্যক্তিৰ বাবে চৰবতৰ যোগান ধৰে ৷কৰিমগঞ্জ জিলাতো উদযাপন কৰা হয় স্বাধীনতা দিৱস । পাথাৰকান্দি চক্ৰ বিষয়াৰ উদ্যোগত গড়কাপ্তানি বিভাগৰ চৰকাৰী আবাসৰ খেলপথাৰত আয়োজিত স্বাধীনতা দিৱসৰ অনুষ্ঠানত পতাকা উত্তোলন কৰে চক্ৰ বিষয়া এল খিংতেই৷