শিলাদিত্যই নিজ উদ্দেশ্যে সিদ্ধিৰ বাবে মন্তব্য কৰে: আঙুৰলতা

বৰপেটা জনীয়াত তৌফিক ৰহমানৰ হৈ নিৰ্বাচনী প্ৰচাৰ চলালে ৰাজ্যিক বিজেপিৰ সভাপতি ৰঞ্জিত দাস আৰু বিধায়িকা আঙুলতা ডেকাই ৷ আওপকীয়াকৈ ৰাইজক শিলাদিত্য দেৱৰ মন্তব্যক গুৰুত্ব নিদিবলৈ আহ্বান বিধায়িকা গৰাকীৰ ৷

জনীয়া,16 অক্টোবৰ: " নিজৰ উদ্দেশ্য পূৰণৰ বাবে কোনোবাই কিবা ক'ব পাৰে,তাত কোনো গুৰুত্ব দিব নালাগে "৷ এই মন্তব্য বটদ্ৰৱাৰ বিধায়িকা আঙুলতা ডেকাৰ ৷

ৰাজ্যত এতিয়া উপ-নিৰ্বাচনৰ গৰম বতাহ ৷ প্ৰত্যেকটো ৰাজনৈতিক দলে তীব্ৰ গতিত চলাইছে নিৰ্বাচনী প্ৰচাৰ ৷ বুধবাৰে জনীয়া সমষ্টিৰ বিজেপি সমৰ্থিত প্ৰাৰ্থী তৌফিক ৰহমানৰ হৈ নিৰ্বাচনী প্ৰচাৰ চলালে বটদ্ৰৱাৰ বিধায়িকা আঙুৰলতা ডেকাই ৷ সংখ্যালঘু সম্প্ৰদায়ৰ লোকৰ বাবে বিগত দিনবোৰত সৰ্বানন্দ সোণোৱালৰ নেতৃত্বত মিত্ৰজোঁটৰ চৰকাৰে গ্ৰহণ কৰা বিভিন্ন উন্নয়ন মূলক কাম-কাজৰ খতিয়ান দাঙি ধৰাৰ লগতে আগন্তুক দিনবোৰত জনীয়া সমষ্টিৰ উন্নয়নৰ স্বাৰ্থত তৌফিক ৰহমানক ভোট দিয়াৰ আহ্বান জনাই বিধায়িকাগৰাকীয়ে ৷ হোজাইৰ বিধায়ক শিলাদিত্য দেৱৰ সাম্প্ৰদায়িক মন্তব্য সন্দৰ্ভত সাংবাদিকে কৰা প্ৰশ্নৰ উত্তৰত বিধায়িকা গৰাকীয়ে আওপকীয়াকৈ কয় যে,কোনোবাই নিজৰ উদ্দেশ্য পূৰণৰ বাবে কিবা ক'ব পাৰে তাত গুৰুত্ব দি লাভ নাই ৷

আনহাতে,নিৰ্বাচনী প্ৰচাৰত আঙুলৰতা ডেকাৰ সৈতে সংগ দিয়ে ৰাজ্যিক বিজেপিৰ সভাপতি ৰঞ্জিত দাসে ৷ জনীয়া-বাঘবৰ সমষ্টিক পাকিস্তানৰ লগত তুলনা কৰা প্ৰসংগক অস্বীকাৰ কৰে ৰাজ্যিক বিজেপিৰ সভাপতিগৰাকীয়ে ৷ তেখেতে কেতিয়াও জনীয়া-বাঘবৰক পাকিস্তানৰ সৈতে তুলনা কৰা নাই,এইয়া মাথো সংবাদ মাধ্যমৰ অপ্ৰচাৰ বুলিও মন্তব্য কৰে ৰঞ্জিত দাসে ৷ লগতে তেখেতে দাবী কৰে যে,উপ-নিৰ্বাচনৰ চাৰিওটা আসনতে বিজেপিয়ে জয়লাভ কৰিব ৷