বাক্সা, ২ জুলাই : ৭২ সংখ্যক ৰাষ্ট্ৰীয় বন মহোৎসৱ সপ্তাহৰ আজি দ্বিতীয় দিন । সমগ্ৰ দেশ তথা ৰাজ্যত পালন হৈছে বন মহোৎসৱ সপ্তাহ(Van mohotsav week) । ঠায়ে ঠায়ে বৃক্ষৰোপণকে ধৰি বিভিন্ন কাৰ্যসূচী ৰূপায়ণ কৰা হৈছে । বন বিভাগে বন মহোৎসৱ সপ্তাহ উপলক্ষে ৰাষ্ট্ৰীয় উদ্যানসমূহতো বিভিন্ন কাৰ্যসূচী অনুষ্ঠিত কৰিছে । ৰাষ্ট্ৰীয় বন মহোৎসৱ সপ্তাহৰ লগত সংগতি ৰাখি বৃহস্পতিবাৰে মানাহ ৰাষ্ট্ৰীয় উদ্যানৰ সমীপৰে এনাজৰী ল'জত অনুষ্টুপীয়াকৈ এক অনুষ্ঠানৰ আয়োজন কৰা হয় ।
ক'ভিড মহামাৰীৰ সংক্ৰমণৰ প্ৰতি লক্ষ্য ৰাখি এইবাৰ অনুষ্টুপীয়াকৈ বন মহোৎসৱ সপ্তাহ পালন কৰা হৈছে । মানাহ ৰাষ্ট্ৰীয় উদ্যানৰ প্ৰাকৃতিক পৰিৱেশ সুন্দৰ কৰি ৰাখিবলৈ গছপুলি ৰোপণ কৰে বন বিভাগৰ বিষয়া-কৰ্মচাৰীৰ লগতে অনুষ্ঠানত উপস্থিত থকা লোকসকলে । উক্ত অনুষ্ঠানত অংশগ্ৰহণ কৰে উদ্যানখনৰ ক্ষেত্র সঞ্চালক অমল কুমাৰ শৰ্মাৰ লগতে বিভাগীয় লোকসকল । লগতে উপস্থিত থাকে ৰঘুনাথ বড়ো, বাবুল ব্ৰহ্মকে ধৰি উদ্যানখনৰ কাষৰীয়া ৰিজৰ্টসমূহৰ লগত জড়িত ব্যক্তিসকলো ।
অমল কুমাৰ শৰ্মাই ভাষণ প্ৰসংগত কয় যে, ১৯৫০ চনতে তদানীন্তন কৃষি মন্ত্ৰী কে এম মুন্সিয়ে ১ জুলাইৰ পৰা ৭ জুলাইলৈ এই বন মহোৎসৱ সপ্তাহ আৰম্ভ কৰিছিল । লগতে সকলোকে বন সুৰক্ষাৰ ক্ষেত্ৰত সদায় সক্ৰিয় হৈ কাম কৰিবলৈ আহ্বান জনায় ।