স্পোৰ্টছ ডেস্ক, 30 আগষ্ট :প্ৰধানমন্ত্ৰী নৰেন্দ্ৰ মোদীয়ে সোমবাৰে চলিত টকিঅ' পেৰালিম্পিকত স্বৰ্ণ জয় কৰাৰ বাবে জেভলিন থ্ৰ'ৱাৰ সুমিত এণ্টিলক অভিনন্দন জ্ঞাপন কৰিছে । "আমাৰ খেলুৱৈসকলে #Paralympics ত জিলিকি আছে ! পেৰালিম্পিকত সুমিত এণ্টিলৰ অভিলেখ ভংগকাৰী প্ৰদৰ্শনৰ বাবে দেশ গৌৰৱান্বিত । সন্মানীয় সোণৰ পদক জয় কৰাৰ বাবে সুমিতক অভিনন্দন । আপোনালোকক ভৱিষ্যতৰ বাবে শুভকামনা জনাইছো " প্ৰধানমন্ত্ৰী মোডীয়ে এইদৰে টুইট কৰে ৷
টকিঅ'ৰ নেচনেল ষ্টেডিয়ামত পুৰুষৰ জেভলিন থ্ৰ’ (স্পোৰ্ট ক্লাছ এফ ৬৪)ত ভাৰতৰ সুমিত এণ্টিলে স্বৰ্ণ জয় কৰে ৷ ফাইনেলত তিনিবাৰ বিশ্ব ৰেকৰ্ড কৰাৰ লগে লগে সুমিতে গোটেই ইভেন্টটোত আধিপত্য বিস্তাৰ কৰিছিল । পোডিয়ামৰ শীৰ্ষস্থান দখল কৰিবলৈ তেওঁৰ পঞ্চমটো প্ৰয়াসত ৬৮.৫৫ মিটাৰৰ এটা আকৰ্ষণীয় থ্ৰ’ কৰিছিল ।
ফাইনেলত আন এজন ভাৰতীয় সন্দীপ চৌধুৰীয়ে 62.20 মিটাৰৰ ছিজন বেষ্ট থ্ৰ’ৰ সৈতে চতুৰ্থ স্থান লাভ কৰে । আনহাতে খেলপথাৰত প্ৰথম স্থান দখল কৰা সুমিতে ৬৬.৯৫ মিটাৰ থ্ৰ’ৰে নিজৰ বিশ্ব ৰেকৰ্ড ভংগ কৰি ফাইনেল আৰম্ভ কৰাৰ লগে লগে নিজৰ সকলো প্ৰতিদ্বন্দীৰ বাবে কঠিন প্ৰত্যাহ্বানৰ সৃষ্টি কৰিছিল । ইয়াৰ পূৰ্বৱৰ্তী বিশ্ব ৰেকৰ্ড আছিল 62.88 মিটাৰ, যিটোতকৈ সুমিতে তেওঁৰ প্ৰথম প্ৰচেষ্টাত প্ৰায় 4 মিটাৰ উন্নত এটা থ্ৰ’ কৰে ।
ইফালে সন্দীপে ইয়াৰ মাজতে তেওঁৰ প্ৰথম প্ৰচেষ্টাত ৬১.১৩ মিটাৰৰ এটা থ্ৰ’ কৰিবলৈ সক্ষম হৈছিল ৷ ফাইনেলখনৰ দ্বিতীয়টো প্ৰচেষ্টাত ৬৮.০৮ মিটাৰৰ আন এটা বিশ্ব ৰেকৰ্ডৰ বাবে জেভলিন দলিয়াই দিয়াৰ সময়ত সুমিতক এটা অভিযানত থকা মানুহৰ দৰে লাগিছিল । এইদৰে অৱশেষত 68.55 মিটাৰৰ অন্তিমটো থ্ৰ’ৰে তেওঁ পুনৰ বিশ্ব ৰেকৰ্ড ভাঙিবলৈ সক্ষম হৈছিল ৷
লগতে পঢ়ক :কাজিৰঙাত বান: Time card ব্যৱস্থাৰে জীৱ-জন্তুৰ মৃত্যু নিয়ন্ত্ৰণৰ লক্ষ্য
