স্পৰ্টছ ডেস্ক,১৪ অক্টোবৰ :আজি আহমেদাবাদত ভাৰত বনাম পাকিস্তান । বিশ্বজুৰি ক্ৰিকেটপ্ৰেমীয়ে ৪ বছৰ ধৰি এই ৰোমাঞ্চকৰ খেলখনৰ বাবে অপেক্ষা কৰি আছিল । ২ বজাৰ লগে লগে বিশ্বৰ সৰ্ববৃহৎ ক্ৰিকেট ষ্টেডিয়ামত ভাৰত-পাকিস্তানৰ খেলখন অনুষ্ঠিত হ'ব । দুয়োটা দলে এই গুৰুত্বপূৰ্ণ খেলখনৰ বাবে সাজু হৈছে । ভাৰতীয় দলটোৱে এদিনীয়া বিশ্বকাপত কেতিয়াও পাকিস্তানৰ হাতত পৰাজিত নোহোৱাৰ অভিলেখ বজাই ৰাখিব বিচাৰিছে । একে সময়তে, পাকিস্তানৰ দলটোৱেও আজি এই অভিলেখ ভংগ কৰিবলৈ খেলপথাৰত যুঁজ দিব । ভাৰতীয় দলটোৰ অধিনায়ক ৰোহিত শৰ্মাৰ ওপৰত সকলোৰে দৃষ্টি নিবদ্ধ থাকিব ।
কেপ্টেইন কুল ৰোহিত শৰ্মাৰ বেটে চিৰপ্ৰতিদ্বন্দী পাকিস্তানৰ বিৰুদ্ধে বহু ভাল প্ৰদৰ্শন কৰি আহিছে । পাকিস্তানৰ বিৰুদ্ধে এদিনীয়াত হিটমেনৰ এক গুৰুত্বপূৰ্ণ অভিলেখ আছে । পাকিস্তানৰ বিৰুদ্ধে ১৮ খন এদিনীয়াত ৰোহিতে ৫২.৪৬ ৰ উৎকৃষ্ট গড়ৰ সৈতে মুঠ ৭৮৭ ৰাণ সংগ্ৰহ কৰিছে । এই সময়ছোৱাত তেওঁ ২ টা শতক আৰু ৭ টা অৰ্ধ-শতক কৰিছে । পাকিস্তানৰ বিৰুদ্ধে ৰোহিতৰ সৰ্বাধিক স্ক'ৰ হৈছে ১৪০ ৰাণ । তেওঁ ২০১৯ বিশ্বকাপত এই স্ক'ৰ কৰিছিল । হিটমেনৰ পৰা আজিৰ খেলখনত ১২৫ কোটি ভাৰতীয়ই একে ধৰণৰ ইনিংছ আশা কৰিছে ।