নিৰ্বাচনী আচৰণবিধি বলবৎ হৈ থাকোতে বড়োভূমিৰ নাম সলনি কৰাত ক্ষুব্ধ কংগ্ৰেছ

কংগ্ৰেছ দলে নিৰ্বাচন আয়োগৰ ওচৰত অভিযোগ দাখিল কৰাৰ লগতে এনেধৰণৰ কুটিল কৌশলে বিজেপিক বি টি আৰৰ নিৰ্বাচনী বৈতৰণী পাৰ কৰাব নোৱাৰে বুলিও কংগ্ৰেছ নেতাগৰাকীয়ে মন্তব্য কৰে ৷

গুৱাহাটী, ৮ অক্টোবৰ : বড়োভূমিৰ পৰিষদীয় নিৰ্বাচনৰ বাবে এই সময়ত সেই অঞ্চলত বলবৎ হৈ আছে নিৰ্বাচনী আচৰণবিধি । তেনেক্ষেত্ৰত বি টি এ ডিৰ নাম সলনি কৰি বি টি আৰ কৰাকে আদি কৰি বিভিন্ন ধৰণৰ ঘোষণা চৰকাৰে কেনেকৈ কৰিব পাৰিছে ? এই প্ৰশ্ন কংগ্ৰেছ দলৰ । প্ৰদেশ কংগ্ৰেছৰ উপ-সভাপতি ডঃ ভগীৰথ কৰণে বৃহস্পতিবাৰে এই সন্দৰ্ভত ক্ষোভ ব্যক্ত কৰি ই টিভি ভাৰতক কয় যে, বিজেপিয়ে ইতিমধ্যে বুজি উঠিছে যে কোনো কাৰণতে বি টি এ ডিৰ নিৰ্বাচনত তেওঁলোক জয়ী হব নোৱাৰে ।

সেয়েহে নিৰ্বাচনী আচৰণবিধি ভংগ কৰি হ'লেও বি টি এ ডি সম্পৰ্কীয় ইটোৰ পিছত সিটোকৈ ঘোষণা কৰি গৈছে । বুধবাৰে অনুষ্ঠিত কেবিনেট বৈঠকতো সিদ্ধান্ত লোৱা হয় যে এতিয়াৰে পৰা বড়োভূমিৰ সকলো চাইনবৰ্ডত অসমীয়া ভাষা বাধ্যতামূলক হ’ব । নিৰ্বাচনৰ প্ৰাকমুহুৰ্তত এনেবোৰ ঘোষণা চৰকাৰখনে কেনেকৈ কৰিব পাৰিছে ?

কংগ্ৰেছ দলে নিৰ্বাচন আয়োগৰ ওচৰত অভিযোগ দাখিল কৰাৰ লগতে এনেধৰণৰ কুটিল কৌশলে বিজেপিক বি টি আৰৰ নিৰ্বাচনী বৈতৰণী পাৰ কৰাব নোৱাৰে বুলিও কংগ্ৰেছ নেতাগৰাকীয়ে মন্তব্য কৰে ।
লগতে পঢ়ক: হাথৰস কাণ্ডৰ তদন্ত সন্দৰ্ভত উচ্চতম ন্য়ায়ালয়ৰ দ্বাৰস্থ হ'ল বেচৰকাৰী সংস্থা