গুৱাহাটী,২৩মে' : মেঘালয়ৰ 13 মাইলত অৱস্থিত ৰিলায়েন্স পেট্ৰল পাম্পৰ বিৰুদ্ধে অভিযোগ একাংশ গাড়ী চালকৰ । দীৰ্ঘদিন ধৰি পেট্ৰল পাম্পটোত পেট্ৰলৰ সলনি পানী দি আহিছে বুলি অভিযোগ উত্থাপন কৰে একাংশ গাড়ী চালকে । ইফালে, এই পেট্ৰল পাম্পটোৰ বাবে বহু বাহন বিকল হৈ পৰাৰ লগতে পেট্ৰল পাম্পটোত পেট্ৰল ভৰায় 100ৰ পৰা 200 মিটাৰ যোৱাৰ পাছতেই বিকল হৈ পৰে গাড়ীৰ ইঞ্জিন । যাৰ বাবে ক্ষোভিত হৈ পৰে স্থানীয় ৰাইজৰ লগতে গাড়ী চালকসকল ।
শুকুৰবাৰেও পেট্ৰল পাম্পটোত পেট্ৰলৰ সলনি পানী দিয়াত উত্তেজিত হৈ পৰে ৰাইজ । যাৰ বাবে, পেট্ৰল পাম্প কৰ্তৃপক্ষক অভিযোগ উত্থাপন কৰে স্থানীয় ৰাইজৰ লগতে একাংশ গাড়ী চালকে । কিন্তু ৰাইজ আৰু গাড়ী চালকৰ অভিযোগ মানি নলয় পেট্ৰল পাম্প কৰ্তৃপক্ষই । অৱশেষত ঘটনাস্থলীত উপস্থিত মেঘালয়ৰ বৰ্ণিহাত আৰক্ষী । আৰক্ষীয়ে অনুসন্ধান কৰি লাভ কৰে যে পেট্ৰল পাম্পৰ ৰিফিল চেণ্টাৰৰ পৰা পেট্ৰলৰ লগত ওলাই আছে পানী । যাৰ বাবে বিকল হৈছে প্ৰায় 25ৰ পৰা 30 খনকৈ বাহন ।