আগৰতালা, 11 নবেম্বৰ : বৃহস্পতিবাৰে আগৰতলাত আৰক্ষীৰ মুখ্য কাৰ্যালয়ৰ সন্মুখত ধৰ্ণা প্ৰদান কৰে ত্ৰিপুৰাৰ তৃণমূল কংগ্ৰেছে ৷ অনাগত ২৫ নৱেম্বৰত অনুষ্ঠিত হ'বলগীয়া নগৰ সমিটিৰ নিৰ্বাচনৰ পূৰ্বে টিএমচি প্ৰাৰ্থীসকলক আক্ৰমণ কৰা বুলি বিজেপিৰ সমৰ্থকৰ বিৰুদ্ধে তেওঁলোকে এই প্ৰতিবাদ সাব্যস্ত কৰে ৷ সাংবাদিকৰ সৈতে মত বিনিময় কৰি টিএমচিৰ জ্যেষ্ঠ নেতা তথা সাংসদ সুস্মিতা দেৱে দাবী কৰে যে, ইমান বোৰ প্ৰমাণ থকা স্বত্বেও ত্ৰিপুৰা আৰক্ষীয়ে আক্ৰমণকাৰী বিজেপিৰ সমৰ্থক সকলক গ্ৰেপ্তাৰ কৰা নাই ।
"আমি একাধিক এজাহাৰ দাখিল কৰিছো । তৃণমূল কংগ্ৰেছৰ প্ৰাৰ্থীসকলক আক্ৰমণ কৰা সকলৰ বিৰুদ্ধে আমাৰ ওচৰত প্ৰতিটো প্ৰমাণ আছে । ত্ৰিপুৰা আৰক্ষীয়ে কিয় কোনো ব্যৱস্থা গ্ৰহণ কৰা নাই ? গ্ৰেপ্তাৰ নোহোৱাৰ কাৰণ কি ? আমি জানিব বিচাৰো কোনে আৰক্ষীৰ হাত বান্ধি ৰাখিছে ।'' সুস্মিতাই পুনৰ কয়, '' তৃণমূল কংগ্ৰেছে মানুহৰ পৰা ব্যাপক সমৰ্থন লাভ কৰিবলৈ আৰম্ভ কৰিছে আৰু সেই কাৰণেই বিজেপিৰ দুৰ্বৃত্তই টিএমচিৰ প্ৰাৰ্থীসকলক আক্ৰমণ কৰিছে । কিন্তু আমি ঘূৰি নাযাও ৷" তেওঁ দাবী কৰিছিল যে, গণতন্ত্ৰৰ সুৰক্ষা নকৰি আৰক্ষীয়ে বিজেপিক সুৰক্ষা দিবলৈ কাম কৰি আছে ।