নেশ্যনেল ডেস্ক,৩১ অক্টোবৰ :শেহতীয়াকৈ একাংশ বিৰোধী নেতাৰ আইফোনলৈ চাঞ্চল্যকৰ মেছেজ আৰু ইমেইল অহাক লৈ ব্যাপক প্ৰতিক্ৰিয়াৰ সৃষ্টি হৈছে । বিৰোধী নেতাসকলে অভিযোগ কৰা মতে ৰাষ্ট্ৰৰ পৃষ্ঠপোষকতাত একাংশ আক্ৰমণকাৰীয়ে বিৰোধী নেতাৰ ফোন হেক কৰাৰ চেষ্টা চলাইছে আৰু সেই সম্পৰ্কীয় সতৰ্কবাণী এপলৰ তৰফৰ পৰা নেতাসমূহৰ ফোনলৈ প্ৰেৰণ কৰা হৈছে । ইয়াৰ আঁৰত চৰকাৰ জড়িত থকাৰ অভিযোগ কৰিছে বিৰোধী নেতাসকলে ।
এনে বিতৰ্ক চলি থকাৰ মাজতে এপল প্ৰতিষ্ঠানে বিষয়টোক লৈ প্ৰতিক্ৰিয়া প্ৰকাশ কৰিছে । এপলে জাৰী কৰা এক বিবৃতিত কোৱা হৈছে যে এপলে এনে কোনো নটিফিকেচন বা অধিসূচনা জাৰী নকৰে । এপলে কোনো নিৰ্দিষ্ট ৰাষ্ট্ৰ পৃষ্ঠপোষকতা কৰা হেকাৰৰ বিষয়ে তথ্য প্ৰকাশ নকৰে । অৱশ্যে এপলৰ কিছুমান অধিসূচনা মিছা সতৰ্কবাণী হ'ব পাৰে । এনে তথ্য জাৰী কৰাৰ কাৰণ ব্যাখ্যা কৰিবলৈ এপল অক্ষম বুলিও উল্লেখ কৰা হৈছে ।